Tres persoas resultaron feridas nunha colisión con dous vehículos implicados no municipio de Abegondo. Unha deles atopábase atrapada no coche.
O sinistro tivo lugar na AC-542, á altura de Beldoña, na parroquia de Mabegondo e un particular alertou dos feitos ao 112 Galicia sobre as 13.20 horas deste venres. Desde o Centro de Atención ás Emerxencias informouse a Bombeiros de Betanzos e a Urxencias Médicas, ademais de Protección Civil e Garda Civil de Tráfico.
Unha das vítimas, unha muller, quedou atrapada no seu vehículo, polo que tivo que ser excarcerada por unha dotación dos Bombeiros. Os tres foron evacuados a un centro hospitalario.
BAÑOS DE MOLGAS. Doutra banda, unha persoa resultou ferida nunha saída de vía este venres en Baños de Molgas. A vítima tivo que ser liberada do interior do seu vehículo. O accidente tivo lugar na estrada que une a localidade con Allariz, en Santa Eufemia, na parroquia de Ambía.
O 112 Galicia tivo constancia do sinistro ás 17.30 horas e informou a Urxencias Médicas e a Protección Civil, que mobilizou unha dotación cun equipo de excarceración. Os feitos tamén foron postos en coñecemento da Garda Civil e unha ambulancia desprazouse ata o lugar do accidente para asistir á persoa ferida.
Tres feridos nunha colisión entre dous vehículos en Abegondo
Unha persoa tivo que ser excarcerada tras sufrir un accidente de tráfico en Baños de Molgas