O Centro de Atención de Urxencias 112 rexistrou este martes dous accidentes con feridos: un na N-634 na localidade coruñesa de Aranga e outro na AP-9 á altura do municipio de Teo.
O primeiro deles sucedeu ás 10.00 horas deste martes cando un camión de transporte chocou cun turismo, informou o 112. O propio condutor do camión foi quen avisou aos servizos de urxencia, xa que a persoa que ía no turismo era incapaz de saír polos seus propios medios, pero finalmente non foi necesario o emprego do equipo de excarceración.
O outro accidente tivo lugar na AP-9 dirección Vigo, onde un turismo se saíu da vía e quedou envorcado na beiravía.
Os condutores dos turismos involucrados en ambos os sinistros precisaron da asistencia dos servizos sanitarios de urxencia.
