Unha colisión frontal entre dous turismos na AC-431 no termo municipal de Laxe saldouse cun ferido grave.
En concreto, o accidente tivo lugar en sentido Ponteceso. Como consecuencia do golpe, un dos vehículos implicados envorcou e o condutor necesitou a axuda dos efectivos de urxencias para saír, segundo indicou o CAE 112 Galicia. Unha vez fóra, foi evacuado polo helicóptero medicalizado con base en Santiago de Compostela.
O accidente produciuse minutos antes das 18.00 horas deste domingo no lugar coñecido como Cabo da Area. Alí acudiron os Bombeiros de Carballo, membros do GES de Ponteceso e voluntarios de Protección Civil. O persoal do 112 Galicia informou, tamén, aos axentes da Garda Civil de Tráfico e a un equipo da Axencia Galega de Infraestruturas.
SAÍDA DE VÍA EN CULLEREDO. Ademais, en Culleredo, outro vehículo saíuse da vía e invadiu a rotonda de acceso á A-6, en Ledoño. O coche quedou nunha situación inestable, por iso o condutor, perfectamente liberado e accesible, permaneceu no interior do coche ata que chegaron os médicos de urxencia.
Desde o Centro de Atención ás Urxencias de Galicia pediuse, tamén, a colaboración dos Bombeiros de Arteixo e dos membros do Servizo Municipal de Protección Civil. O sinistro rexistrouse ás 16.30 horas.
Unha colisión frontal entre dous turismos deixa un ferido grave en Laxe
Outro vehículo saíuse da vía en Culleredo
