Un incendio de escasas dimensións rexistrado este mércores nunha vivenda de Arteixo saldouse cunha muller ferida, segundo informa o 112.
A vítima sofre varias queimaduras nunha man e foi atendida no lugar dos feitos polos efectivos sanitarios. Con todo, declinou ser evacuada a un centro hospitalario.
O lume declarouse na campá extractora da cociña dun piso situado na Travesía de Meicende. Un particular chamou ao 112 ás 12.30 horas para informar de que estaba a saír fume polas fiestras da vivenda e había unha persoa pedindo axuda.
O centro de atención ás urxencias avisou aos bombeiros de Arteixo e a Urxencias Médicas, así como a Protección Civil e á Policía Local.
