O Partido Popular de Vigo presentará este mes unha denuncia contra o alcalde olívico, Abel Caballero, por un suposto delito contra a saúde pública, ao entender que hai "indicios máis que sobrados de que hai responsabilidade penal" na xestión da auga por parte do Goberno municipal, así como por negación "da realidade e ocultar informes absolutamente palmarios".
Así o anunciou este martes a portavoz popular, Elena Muñoz, que incidiu en que esta é unha decisión "tomada de forma consciente e meditada, logo de analizar cada detalle e cada dato con asesores xurídicos durante os últimos meses".
En relación con iso, remarcou que nos últimos meses "decenas de analíticas" arroxaron que a auga na cidade era "non potable", e mostraba valores superiores ao permitido para ser apta para consumo humano en ferro, cloro, trihalometano e turbidez.
Ademais, recordou que, aínda que o PP solicitou analíticas e informes sobre os métodos empregados para estudar a auga, non llos remitiron. "Hai casos que exceden todos os límites. Ímonos aos tribunais porque non todo vale, a saúde vigueses por encima de todo", remarcou.
MULTA DA XUNTA. A edila fixo este anuncio un día logo de coñecerse que a Xunta impuxo ao Concello de Vigo unha multa de 21.250 euros pola suposta comisión de tres infraccións graves e unha leve en materia de abastecemento de auga nos controis do laboratorio municipal.
En concreto, a Xunta sostén que o laboratorio municipal non está "nin certificado nin acreditado", que as mostras que se tomaron nas billas "non eran representativas de todo Vigo", e que existen "numerosas analíticas de auga non apta para o consumo" en mostras dos anos 2016 e 2017 nas zonas de Canido, Areal, Cabral, Beiramar, A Salgueira, Saiáns e o edificio municipal.
Finalmente, mantén que nestes casos detectados, "non se seguiron os protocolos que esixe a normativa cando se detecta auga non apta para o consumo", os cales consisten en confirmar "ás 24 horas se continúa esta situación e informar á autoridade sanitaria".
"DÁME IGUAL O QUE FAGA O PP". Cuestionado polos xornalistas en relación con este tema, durante unha rolda de prensa celebrada tamén este martes, Caballero limitouse a dicir que lle dá "exactamente igual o que diga ou faga o PP".
No entanto, este luns, en resposta á multa da Xunta, Caballero si que defendeu que a auga de Vigo foi "sempre potable, en cada segundo de cada minuto, de cada hora, de cada día, de cada semana e de cada mes, dos últimos 10 anos".