miércoles. 21.10.2020 |
El tiempo
miércoles. 21.10.2020
El tiempo

Abatido o autor do apuñalamento múltiple no centro de Glasgow

Policía e efectivos de emerxencias en Glasgow. EFE
Policía e efectivos de emerxencias en Glasgow. EFE

O ataque tivo lugar nun hotel do centro e deixou seis persoas feridas

Seis persoas resultaron feridas este venres no ataque cun coitelo nun hotel do centro de Glasgow (Escocia) cometido por un home, que morreu abatido pola Policía. O corpo de seguridade descartou que se trate dun incidente terrorista.

Os feridos son un axente de policía de 42 anos, que está hospitalizado en situación "estable", e outros cinco homes de 17, 18, 20, 38 e 53 anos, que tamén se atopan en centros hospitalarios, segundo informou a Policía de Escocia. As primeiras informacións apuntaban que varias persoas atacadas polo agresor faleceran, pero ese extremo foi desmentido despois.

"Os nosos pensamentos están coas familias dos feridos, incluído o noso oficial (...) O incidente non se trata como terrorismo e a nosa investigación sobre as circunstancias continúa. Non existe un risco maior para o público, con todo, a rúa permanece pechada e a xente debe evitar a área", apuntou Steve Johnson, adxunto ao xefe de Policía de Escocia.

Confirmou que non se busca a ninguén máis por estar implicado neste suceso, do que aínda se descoñecen motivos ou as relacións entre os implicados.

A Policía descarta que se trate dun incidente terrorista

A zona pechada forma parte da área comercial do centro de Glasgow, habitualmente moi concorrida, aínda que debido á pandemia de coronavirus a maioría de comercios están pechados. 

Segundo a BBC, o hotel, que estaría pechado ao público polas restricións do confinamento que aínda non se levantaron en Escocia, podería estar a ser usado como aloxamento temporal para solicitantes de asilo, persoas en proceso de trámite para intentar obter o status de refuxiados no Reino Unido.

O primeiro ministro británico, Boris Johnson, afirmou estar "profundamente triste" ante o ocorrido na maior cidade de Escocia. "Os meus pensamentos están con todas as vítimas e as súas familias. Grazas aos nosos valentes servizos de urxencia que están a responder", indicou en Twitter. 

A ministra principal de Escocia, Nicola Sturgeon, instou os cidadáns a seguir "a recomendación" das autoridades policiais de evitar a zona acordoada, mentres "xestionan o incidente".

Abatido o autor do apuñalamento múltiple no centro de Glasgow
Comentarios