jueves. 22.08.2019 |
El tiempo
jueves. 22.08.2019
El tiempo

Veloso segue líder en Portugal a pesar dunha caída

Veloso sigue líder. NUNO VEIGA
Veloso sigue líder. NUNO VEIGA
O ciclista arousán caeu a dous quilómetros de meta

O español Héctor Sáez (Euskadi-Murias) gañou este mércores a sexta etapa da Volta a Portugal, na que o arousán Gustavo César Veloso (W52-FC Porto) se mantén como líder a pesar de sufrir unha caída a dous quilómetros da meta.

Tras a xornada de descanso do martes, os ciclistas volveron á estrada no medio da choiva, nunha etapa marcada por unha escapada de once corredores que nos quilómetros finais foise reducindo. Sáez conseguiu aguantar e cruzou o primeiro a meta, tras cubrir os 189,2 quilómetros entre Torre de Moncorvo e Bragança nun tempo de 4h.55:14.

O podio desta sexta etapa completárono o canadense Benjamin Perry (Israel Cycling), que cruzou a meta 7 segundos logo de Sáez, e o tamén español Txomin Juaristi (Equipo Euskadi), que entrou a 10.

Entre os dez primeiros clasificados da xornada deste mércores tamén había outros dous españois, Julen Amezqueta (Caixa Rural-Seguros), que quedou cuarto, e Álvaro Trueba, noveno.

A camisola amarela, Veloso, chegou ao final da etapa integrada no pelotón pero sufriu unha caída xunto a outros corredores ao seu paso pola cidade de Bragança.

O veterano ciclista, de 39 anos, conseguiu manter a súa posición na xeral pese ao contratempo, aínda que acabou a etapa con molestias. O seu compañeiro de equipo João Rodrigues mantense segundo a 15 segundos e o tamén español Vicente García (Aviludo-Louletano) terceiro, a 22 segundos.

A sétima etapa levará aos corredores a percorrer este xoves os 156,2 quilómetros entre Bragança e Montalegre, onde a meta estará na Serra do Larouco, un porto de primeira categoría. A 81ª Volta a Portugal, na que participan 19 equipos, concluirá o día 11 no Porto cunha etapa contrarreloxo.

Veloso segue líder en Portugal a pesar dunha caída
Comentarios