A sección primeira da Audiencia Provincial da Coruña, de acordo co veredicto do Tribunal do Xurado, condenou a quince anos e medio de cárcere e a sete anos de liberdade vixiada ao home que asasinou a outro na Institución Benéfico Social Padre Rubinos da Coruña en xaneiro de 2018.
A pena imposta é a mesma que no primeiro xuízo, que o Tribunal Superior de Xustiza de Galicia (TSXG) declarou nulo e ordenou repetir ao aceptar o recurso da defensa, que sostivo que o condenado sufriu "indefensión" ao non ser sometido a un exame psiquiátrico por parte dun profesional do Sergas, segundo informa o alto tribunal galego nun comunicado.
O pasado 23 de abril, o propio condenado J.M.L.C. asegurou na vista de apelación do seu caso no TSXG que se confundiron coas cartas que viñeron de Inglaterra", dixo en referencia aos informes médicos nos que se recoñecía que sofre esquizofrenia paranoide e trastorno de personalidade.
Segundo o seu avogado, o centro forense Imelga só tivo en conta o trastorno de personalidade á hora de valorar ao acusado; de acreditarse a esquizofrenia paranoide, esta sería causa eximente de responsabilidade.
Agora, neste novo fallo, o maxistrado presidente do Tribunal, á hora de redactar a sentenza, tivo en conta a atenuante simple de alteración psíquica, pero rexeitou a consideración da defensa de que o acusado tivese totalmente anuladas as capacidades volitivas e intelectivas cando cometeu os feitos.
"Acredítase unicamente un trastorno da personalidade asociado cun consumo crónico de bebidas alcohólicas e outras sustancias de abuso que lle produciría unha limitación das facultades sen anulación", indica o xuíz.
Así mesmo, a Audiencia sinala que "sen motivo aparente" o sospeitoso apuñalou por sorpresa á vítima no peito cunha arma branca que ocultaba entre as súas roupas e insiste en que o ataque se produciu "de forma rápida, imprevista e eficaz, limitando calquera posibilidade de defensa".
