O descubrimento da presenza da temida carabela portuguesa nalgunhas das praias máis coñecidas en Sanxenxo acendeu as alarmas no Concello. O Servizo Municipal de Emerxencias alertou este xoves do achado de varios exemplares mortos en diferentes areais. Incluso inerte, este organismo, moi semellante a unha medusa e que chama poderosamente a atención pola súa gama de cores, é moi perigoso, xa que se trata dunha especie venenosa que pode causar doenzas de gravidade ou, en casos puntuais, a morte.
É por iso polo que a Administración municipal fai un chamamento aos veciños e visitantes para que, no caso de que se acheguen aos areais durante estes días, estean ollo avizor. Ademais, recoméndase vixiar ás mascotas para que non escudriñen ou mordan os restos das "carabelas portuguesas", o que podería levar a un fatal desenlace.
Doutra banda, o Concello confirmou que o departamento responsable da limpeza de praias intensificará estes días as súas tarefas para retirar todos os restos no menor tempo posible.
PRECEDENTES. Non é a primeira vez que este organismo aparece nas praias sanxenxinas. Hai un lustro, en abril de 2013, o Concello viuse obrigado a prohibir o baño en Silgar, Major e Montalvo, ante a presenza masiva desta especie.
Aquela primavera resultou máis calorosa e atraeu a moitos bañistas aos areais locais.
