A Sección Cuarta da Sala do Penal da Audiencia Nacional condenou a un home a seis meses de prisión por un delito de encubrimento consistente en axudar a ocultarse a unha integrante de Resistencia Galega sobre a que pesaba unha condena de seis anos de cárcere polo Tribunal Supremo.
Bruno Vence foi xulgado a semana pasada e aínda que nun principio a Fiscalía pedía para el sete anos de prisión, finalmente modificou as súas conclusións despois da declaración do acusado. O Ministerio Público rebaixou a petición a medio ano tras escoitalo asegurar que non pertence a ningunha organización terrorista e que o seu único fin era axudar a unha amiga da infancia.
Vence recoñeceu no xuízo que axudou a María Osorio a esconderse na localidade portuguesa de Vila en abril de 2014 e que, tras a súa detención en Ponferrada (León), ocultou as súas pertenzas na súa casa, que despois entregou á Garda Civil ao saber o que estaba a ocorrer, versión que foi ratificada por un axente.
MOVIDO POLA AMIZADE
A sala considera probados os feitos e conclúe que o acusado actuou "movido por un sentimento de amizade e non en prol da organización Resistencia Galega, á que nada fixo por facerlle chegar o material relativo a María Osorio e si, polo contrario, foi aos axentes policiais aos que lles revelou o lugar exacto onde os gardou".
Na sentenza, o tribunal considera "circunstancia atenuante" a confesión "tardía" do acusado e que respondeu a "todas e cada unha" das preguntas que se lle formularon durante o xuízo, recoñecendo os feitos.
