O ancián do vídeo: "Levo uns días sen durmir desde que tomei esa sustancia"

O ancián que foi incitado a esnifar unha sustancia por un grupo de mozos a pasada fin de semana en Lugo asegura que desde que inhalou ese po branco leva "uns días sen durmir".

En declaracións a La Sexta, M.M. explicou que accedeu a tomar esa sustancia por medo. "Como eran uns cantos rapaces, asusteime non vaia a ser que me dean unha navallada".

O home admitiu que se asustou porque está "transplantado do corazón". "Tomo 20 pastillas ao día porque teño máis problemas", afirmou.

ANÁLISE DE SANGUE. Polo momento descoñécese que sustancia inhalou. O ancián foi sometido a unha analítica para determinar se hai restos de cocaína en sangue, o que determinaría se o feito pode ser delito.

A Policía, que instrúe dilixencias sobre o caso, está agora á espera deste informe mentres seguiu este xoves practicando detencións sobre estes feitos, ocorridos na Fonte dos Ranchos e que foron coñecidos ao longo da xornada do mércores tras ser difundido o vídeo polos propios mozos- polas redes sociais.

A Policía Nacional detivo catro mozos, dos que dous foron deixados en liberdade polos propios efectivos policiais xa o pasado mércores e os outros dous pasaron este xoves a disposición xudicial. Tras prestar declaración no xulgado, estes tamén quedaron en liberdade.

Os catro detidos son maiores de idade e as súas idades oscilan entre os 19 e os 26 anos. Algúns deles teñen antecedentes penais.