O tripulante dunha lancha de recreo foi denunciado no xulgado por supostamente arremeter en dúas ocasións coa súa embarcación contra unha dorna que estaba a faenar ao choco na ría de Pontevedra, entre o porto de Campelo e a illa de Tambo, informaron fontes do Concello de Poio.
Segundo as pescudas da Policía Local, o incidente produciuse porque o tripulante da lancha de recreo non quería que o pescador estivese nesa zona, e por iso arremeteu contra el en dúas ocasións antes de fuxir cara o porto de Marín.
O tripulante da dorna, que ía acompañado, decidiu presentar denuncia ante a Policía Local de Poio, que logrou identificar ao suposto causante do incidente e informoulle de que era investigado polos delitos de danos e inxurias á vítima, que reclama os danos sufridos na súa embarcación.
