O alcalde de Vigo, Abel Caballero, insistiu este xoves en que o Concello non pagará a subvención do billete de bus urbano a viaxeiros non empadroados na cidade, no marco do Plan Metropolitano de Transporte (ao que a cidade olívica non se adheriu). Nunha rolda de prensa, denunciou que "a Xunta segue co seu empeño de que Vigo pague os buses aos cidadáns que non son de Vigo".
"Feijóo quere que paguemos os buses urbanos de cidadáns de fóra, e tanto é así que condicionou a Área Metropolitana a que paguemos ese imposto, sen límites", proclamou o rexedor. "Pero por moito que se empeñe, ten que ser a Xunta a que pague, porque é transporte interurbano", advertiu Abel Caballero, quen volveu a criticar ese "empeño de que Vigo paga todo". "Iso non vai pasar mentres eu sexa alcalde", sentenciou.
