viernes. 28.01.2022 |
El tiempo
viernes. 28.01.2022
El tiempo

Centos de docentes protestan cunha cacerolada contra o protocolo para o próximo curso

Los representantes de los sindicatos de Educación de Galicia formados por la CIG, UGT, CCOO y ANPE se han concentrado esta mañana delante de la consellería de Educación de la Xunta de Galicia, realizando una cacerolada protesta
Los representantes de los sindicatos de Educación de Galicia formados por la CIG, UGT, CCOO y ANPE se han concentrado esta mañana delante de la consellería de Educación de la Xunta de Galicia, realizando una cacerolada protesta
Piden consenso á Consellería de Educación, á que acusan de "primar o economicista" sobre a saúde da comunidade educativa 

Centos de profesores concentráronse este mércores ante a Consellería de Educación e protestaron cunha cacerolada contra o protocolo contra a Covid-19 para o próximo curso presentado polo Goberno galego, que os sindicatos consideran "temerario e improcedente", segundo o responsable de CIG Ensino, Suso Bermello. 

Os participantes na mobilización criticaron o documento por considerar que non garante a saúde nin do profesorado nin do alumnado e presentaron unha pancarta co nome do protocolo. "Imos facer o único que se pode facer con este protocolo: fumigalo", manifestaron e asperxeron o cartel. Entre as súas reclamacións están a contratación de máis docentes e que haxa menos alumnos por aula para garantir a distancia de seguridade. 

O pasado xoves, cando Educación presentou o documento na Mesa Sectorial, os sindicatos reclamaron a retirada do borrador e abandonaron a reunión. 

En declaracións aos medios antes de comezar a protesta deste mércores, Bermello reprochou á Xunta que estea "a impor" o protocolo, que "pon en risco a saúde e a presencialidade do ensino público" para o curso 2020-21, e acusou o Goberno galego de "evasión de responsabilidades" e de descargalas sobre o profesorado e os equipos directivos. 

"Todo se reduce a un criterio, que é o do custo cero", criticou e rexeitou conceptos "inventados" como o da aula burbulla. Ademais, considerou que non se propoñen medidas para evitar "a ruptura absoluta da equidade" ocorrida ao ter que dar as clases de forma telemática durante o confinamento, o que impide "a universalidade do dereito á educación". 

Pola súa banda, a secretaria xeral da Federación de Ensino de CC OO, Luz López, acusou á Xunta de falta de vontade de negociar: "Cando se quere negociar faise o que nós pedimos desde hai meses, que é crear grupos de traballo, que se nos presente un borrador e, a partir de aí ir traballando e acordando". 

O próximo curso, dixo, "está a planificarse con case absoluta normalidade, a custo cero e incumprindo nalgúns casos a lei de prevención de riscos laborais". 

Censurou, ademais, que se "deixe ver" que a limpeza dalgúns utensilios na aula dependerá dos docentes e o alumnado, ao que "non se lle pode pedir utilizar materiais tóxicos". López considerou que "se está primando o economicista sobre a garantía da saúde de toda a comunidade educativa".

"NON GASTAR UN PESO". O presidente do sindicato ANPE en Galicia, Julio Díaz Escolante, incidiu neste sentido e criticou que "se está primando non gastar un duro", mentres que "no resto de comunidades" están a contratarse máis profesores e adaptando os centros. 

"A Xunta está a facer todo ao revés: coas instalacións que temos, tentar por todos os medios que non nos custe nada e meter aos alumnos de calquera xeito nas aulas e arriscar a saúde", declarou e destacou que a proposta de separación dun metro non cumpre as normas do Ministerio de Sanidade. 

Ao seu xuízo, a Consellería non está a preparar tampouco ao profesorado para o caso de que volva haber un confinamento e haxa que recorrer á teleformación.

ENSINOS QUE ESTÁN "VENDIDOS". A representante de UGT Ensino, Paula Carreiro, pronunciouse no mesmo sentido e criticou que a Xunta pretende "unha educación a custo cero e que non garante a sanidade". Non está preparado tampouco o sistema informático, dixo. 

As familias e o alumnado, agregou están "deixados da man" e hai determinados ensinos que "están vendidas" e non contan con protocolos específicos, como as musicais ou as dirixidas a alumnos que necesitan apoios específicos. "Non podemos dar o visto e prace a un protocolo que non está terminado", manifestou. 

Por parte da Confederación Galega de ANPAs de Centros Públicos (Confapa), José Antonio Álvarez Caride reprochou que a Xunta "non conta coas familias para nada" e non foron convocadas para ningunha reunión. Ademais, censurou que Educación deixe aos centros a decisión de se haberá extraescolares, o que vulneraría o dereito á conciliación. 

Centos de docentes protestan cunha cacerolada contra o protocolo...
Comentarios