Condenado a 15 anos de cárcere un exmilitar que asasinou a un veciño de Ordes

O ataque produciuse "sorpresivamente" e nunha zona que estaba "mal iluminada e escasamente transitada", polo que a vítima careceu de posibilidade de defensa, segundo consta na sentenza
Audiencia Provincial de A Coruña. EFE
photo_camera Audiencia Provincial de A Coruña. EFE

A sección primeira da Audiencia Provincial da Coruña condenou 15 anos de prisión a un exmilitar que asasinou a un veciño de Ordes co que previamente mantivera unha discusión de madrugada no campo da feira desa localidade. 

Segundo informou o TSXG, tras a disputa, segundo considerou probado o tribunal do xurado, sobre as 4,00 do 17 de xullo de 2016, o acusado apuñalou á vítima no pescozo cando camiñaba pola rúa Compostela en dirección ao seu domicilio. 

Así, o ataque produciuse "sorpresivamente" e nunha zona que estaba "mal iluminada e escasamente transitada", polo que a vítima careceu de posibilidade de defensa, segundo consta na sentenza. 

No fallo, o maxistrado presidente tribunal do xurado indica que "unha única puñalada, certeira e fulminante, determinou a morte inmediata da vítima", cuxo corpo "non presentou ningunha ferida de defensa".

INIMIZADE. Ademais, na resolución considérase acreditado que o condenado e o falecido, "dedicados habitualmente á venda polo miúdo de drogas", tiñan ponde a mal e que o día dos feitos tiveron unha pelexa, tras a cal a vítima se marchou para a súa casa e chamou por teléfono para pedir a presenza dunha patrulla policial. Posteriormente "foi degolado polo acusado, que tiña adestramento militar". 

No cadáver só apareceu o perfil xenético do sospeitoso, cuxo vehículo foi detectado á hora e no lugar do suceso. Ademais, subtraeulle o teléfono móbil á vítima, que foi situado "nunha vía de escape compatible coa ruta de volta do acusado á súa casa". 

Poucos días logo dos feitos, o condenado e a súa familia trasladáronse a Madrid e, despois, el viaxou Colombia. "Todos os indicios conflúen e determinan que só o acusado estivo en situación de cometer o feito", sinala o maxistrado presidente.