A sección primeira da Audiencia Provincial da Coruña, de acordo co veredicto do Tribunal do Xurado, condenou a quince anos e medio de cárcere e a sete anos de liberdade vixiada ao home que asasinou a outro no exterior da Institución Benéfico Social Pai Rubinos, un crime ocorrido o 8 de xaneiro de 2017.
Despois de que o xurado popular considerase culpable ao acusado, a Audiencia imponlle agora esta pena ao home como autor dun delito de asasinato con aleivosía.
Así, o fallo considera probado que o home apuñalou mortalmente á vítima na tarde do 8 de xaneiro de 2018, cunha arma branca e de dobre fío que portaba na súa cazadora. A puñalada atravesoulle o corazón, o que lle causou a morte nun curto espazo de tempo.
O crime, estima, realizouse con "aleivosía", dado que o condenado actuou "por sorpresa" e a vítima non tivo a posibilidade de defenderse. "Logo de manter unha conversación co falecido, (o condenado) deuse a volta e fixo simulacro de irse, facéndolle crer que abandonaba o lugar, pero se virou de novo repentinamente e, de forma rápida, sacou a arma de entre as súas roupas e cravoulla", relata o tribunal, á vez que destaca que a vítima "non esperaba o ataque e non tivo oportunidade de defenderse".
O ataque produciuse "sen que conste o motivo" e, considera a sala, con intención "de acabar coa vida" do home ou, polo menos, sendo consciente de risco "evidente da súa acción".
ATENUANTE DE ALTERACIÓN PSÍQUICA. No fallo, os maxistrados tiveron en conta a atenuante simple de alteración psíquica, pero rexeitaron, como demandaba a defensa, que o acusado tivese "totalmente anuladas" as capacidades volitivas e intelectivas cando cometeu os feitos.
"Acredítase o trastorno de personalidade e un consumo crónico de bebidas alcohólicas e outras sustancias de abuso, pero o informe forense unicamente estima unha afectación das capacidades intelectivas e volitivas leve", indican na sentenza que, xa que logo, considera que, a pesar da alteración, o home era consciente dos seus actos.
Ademais da pena de cárcere, a Audiencia condena ao asasino a indemnizar a cada un dos tres fillos menores do falecido na suma de 99.496 euros, a cada un dos pais con 44.220 euros e a cada un dos irmáns do falecido en 16.582 euros.