O incendio que afectaba a terreos entre os municipios de Crecente (Pontevedra) e Cortegada (Ourense) quedou controlado este domingo tras queimar 30 hectáreas, informou a Consellería do Medio Rural.
O lume declarouse na parroquia de Filgueira, en Crecente, e afectou tamén á de Rabiño, no municipio veciño de Cortegada. Empezou ás 15.55 horas do sábado e quedou controlado ás 5.45 horas deste domingo.
A medición da superficie afectada é provisional ata que se parametrice o terreo, recordou a Consellería, que indicou que para extinguir este incendio traballaron ata o momento un técnico, 11 axentes, 36 brigadas, 21 motobombas, dúas pas, sete avións e sete helicópteros.
O fume obrigou a cortar a vía de tren entre Vigo e Ourense, pero a circulación quedou restablecida a pasada medianoite.
