A coordinadora de En Marea solicitará na súa reunión deste martes a convocatoria do Consello das Mareas, máximo órgano de En Marea como partido instrumental entre congresos, para que se manifeste sobre a posible consulta para decidir sobre a dimisión da deputada Paula Quinteiro tras o seu incidente coa policía local de Santiago a madrugada do pasado 18 de marzo.
O Consello das Mareas deberá determinar este sábado se finalmente pon en funcionamento a consulta aos militantes para decidir o futuro da deputada Paula Quinteiro e que o propio portavoz da formación, Luís Villares, anunciou que se activaría se a parlamentaria non dimitía.
As persoas afíns a Villares teñen maioría no órgano de dirección que se reunirá esta fin de semana, xa que, ademais os integrantes críticos coa súa xestión non adoitan acudir á reunión deste órgano.
De feito, a última vez que o fixeron foi o pasado 23 de marzo, pero acabaron abandonando o encontro ao entender que no transcurso do mesmo lanzáronse ataques "persoais" contra a deputada Paula Quinteiro.
Deste xeito, tal e como confirmaron a Efe, é previsible que esta fin de semana poida activarse unha consulta ás bases que non é apoiada polo grupo parlamentario e tampouco por Podemos, partido ao que pertence a deputada que protagonizou o incidente.
Este sábado tamén estaba previsto que se celebrase o terceiro encontro municipalista das Mareas galegas no municipio de Mos, pero que finalmente se prevé aprazar dada a situación actual da formación.
A RENUNCIA DE HERMIDA. Noutra orde de cousas, despois de que o xa exdeputado do grupo de En Marea Juan Merlo ratificase ante a Mesa do Parlamento a renuncia á súa acta tras coñecerse que no seu currículo aparecía como enxeñeiro sen ter os estudos acabados, este martes o presidente do Parlamento chamou en pleno ao seguinte na lista, Xoán Hermida, que aínda que anunciou en días pasados que renunciaría non enviou a documentación necesaria para iso.
No entanto, é previsible que presente a súa renuncia formal ante a Mesa da Cámara na reunión da próxima semana, para a que aínda non hai data porque o martes día 1 de maio é festivo.
Tras a súa renuncia, a lista correría ata Julia Torregrosa, militante de Podemos e afín á secretaria xeral de Podemos Galicia, Carmen Santos. Esta mesma semana tamén se designará ao substituto de Merlo como número dous da formación en Galicia para o que se pretende designar a un secretario de organización "de consenso".
Desta forma, En Marea deixou de ser o principal grupo da oposición ao non formalizar aínda o recambio para Merlo.
A forza rupturista pasa de 14 a 13 parlamentarios, polo que o PSdeG-PSOE, empatado con En Marea en escanos pese a obter menos votos nas autonómicas en 2016, se convirta momentáneamente no principal grupo da oposición. Ao menos, durante a celebración do pleno que arrancou este martes.
