Detido un home por agredir cun coitelo á súa muller en Mogor, en Marín
A muller foi trasladada ao Hospital Montecelo, aínda que non se teme pola súa vida
Un home foi detido este martes pola mañá pola Policía Nacional logo de agredir cun coitelo á súa muller en Mogor, en Marín. O agresor, veciño da localidade madrileña de Torrexón de Ardoz, acoitelou á súa compañeira en diversas partes do corpo.
O suceso produciuse á 1.30 horas nunha vivenda do Camiño de Cividanes, segundo informaron fontes oficiais, no domicilio vacacional da parella.
A Policía foi avisada polos veciños ante os ruídos provocados por unha forte discusión que estaba a ter lugar na vivenda, onde tamén se atopaban os dous fillos menores da parella. A agresión produciuse despois de que a muller lle comunicara a súa intención de iniciar os trámites de separación.
A vítima presenta "cortes no corpo" e o seu prognóstico é reservado, aínda que fontes sanitarias puntualizan que non se teme pola súa vida. A muller está ingresada no Hospital Montecelo de Pontevedra, onde os axentes esperan poder tomarlle declaración sobre o sucedido.
Pola súa banda, o home permanece detido nos calabozos da Comisaría de Pontevedra mentres a Policía completa as dilixencias para polo a disposición xudicial como presunto autor dun delito de homicidio en grao de tentativa.
CASOS ANTERIORES. Esta agresión dun home á súa parella prodúcese menos dunha semana despois de que un home de 54 anos de idade fora detido, o pasado mércores na Coruña, tras degolar á súa muller, que tiña 57 anos.
Esa foi a segunda vítima mortal da violencia machista rexistrada na comunidade galega no que vai de ano e o agresor foi enviado a prisión provisional comunicada e sen fianza polo Xulgado de Violencia sobre a Muller da Coruña.
A primeira vítima mortal foi unha muller de 47 anos que foi asasinada o pasado mes de xuño no Porriño polo seu marido, que despois se suicidou pegándose un tiro coa mesma escopeta coa que lle disparara.
