Unha vez superada a selectividade, chega o momento de elixir carreira. A partir deste martes, e ata o próximo 28 de xullo, ábrese o prazo de preinscrición ao Sistema Universitario Galego (SUG), conformado polas universidades de Vigo, Santiago de Compostela e A Coruña. Nesta edición, serán un total de 10.992 os estudantes galegos que, superando os exames de Avaliación de Bacharelato para o Acceso á Universidade (ABAU), deberán escoller que grao de estudos cursar o próximo ano académico 2020-2021. Os aspirantes realizarán a inscrición a través da aplicación informática Nerta e a primeira das listas de admitidos publicarase o 11 de agosto.
Logo de vivir a selectividade máis multitudinaria e atípica da historia recente, os estudantes galegos prepáranse agora para iniciar os trámites de solicitude de acceso aos graos que decidan cursar. O pasado 16 de xuño coñecéronse as notas finais da selectividade en Galicia nas que un 87,96% dos mozos que se presentaron conseguiron superar os exames, tres puntos menos que en 2019, cando a cifra de aprobados ascendía ao 91, 46%. En total presentáronse á selectividade 14.379 alumnos, dos que 12.497 acudiron á parte voluntaria, obtendo o aprobado 10.992, segundo os datos da Comisión Interuniversitaria de Galicia (CIUG).
O seguinte paso para os estudantes consistirá agora en seleccionar 5 titulacións universitarias diferentes, cun máximo de dez peticións no caso de que o ensino se imparta en máis dun centro de Galicia. As prazas adxudicaranse por orde en función da maior nota conseguida e a primeira listaxe de admisión farase público o 11 agosto. Haberá nove adxudicacións.
NOTAS DE CORTE. A nota de corte dunha titulación representa a meta numérica á que necesitan chegar todos aqueles estudantes que desexan optar coa súa puntuación a iniciar estudos de grao superior. É dicir, é a nota de acceso máis baixa de entre todos os admitidos a ese grao. En Galicia, e nesta edición da selectividade, repítense as tendencias de anos anteriores: as notas de corte máis altas están en ciencias, sanidade e comunicación.
O sistema universitario galego contará o próximo curso con tres titulacións de nova implantación
O dobre grao de Matemáticas e Física copa a puntuación máis alta (13,270), seguido da tamén dobre titulación de Enxeñería Informática e Matemáticas (13,024). No ámbito da información destaca o dobre grao de Comunicación Audiovisual e Xornalismo (12,968), mentres que na rama sanitaria Medicina, sitúase nun 12,940.
O próximo mes de agosto revelará se o efecto covid-19 ascenderá ou descenderá as notas para 2021.
TRES NOVOS GRAOS. O sistema universitario galego contará o próximo curso con tres titulacións de nova implantación. Esta oferta engloba os graos de Empresa e Tecnoloxía, Bioquimica (USC) e Nanotecnoloxía (Universidade da Coruña).
Xunto a eles inclúense catro novos programas de simultaneidade de grao na institución académica viguesa en ADE e Enxeñería Informática, Ensinaría Biomédica e Enxeñaría Industrial Automática, Enxeñaría Biomédica e Ensinaría Mecánica e Ensinaría Mecánica e Enxeñaría Electrónica Industrial e Automática. A novidade no campus de Pontevedra é a modalidade virtual do grao de Dirección e Xestión Pública.
