A situación das plantas de Alcoa na Coruña e Avilés, cun expediente de regulación de emprego anunciado pola multinacional do aluminio, capitalizou este martes boa parte da reunión celebrada na Coruña entre o presidente da Xunta, Alberto Núñez Feijóo, e o alcalde desa cidade, Xulio Ferreiro.
Os dous cualificaron o encontro de cordial, á parte de valorar a súa utilidade, e expúxose no mesmo a necesidade dun marco tarifario eléctrico para as electrointensivas, -incluída Alcoa-, empresa que senta este martes coas organizacións sindicais con motivo da primeira das seis reunións estipuladas a consecuencia do mencionado Ere.
O xuíz de Róterdan (Holanda) desestimou a demanda interposta polo comité europeo de Alcoa para solicitar a paralización do expediente de regulación de emprego para as plantas de Avilés e A Coruña, que suman 686 traballadores.
Outros asuntos que se trataron nesta entrevista entre Feijóo e Ferreiro son a intermodal, co propósito de axilizala; o novo hospital, e, así mesmo, a necesidade de aliviar "a débeda da autoridade portuaria", tal e como demandou o rexedor, referente da Marea Atlántica.
