El tiempo
viernes. 03.02.2023
El tiempo

Feijóo anunciará "nuns días" a data electoral e propón unha campaña "máis curta"

O presidente da Xunta, Alberto Núñez Feijóo, durante a reunión do consello da Xunta. EFE
O presidente da Xunta, Alberto Núñez Feijóo, durante a reunión do consello da Xunta. EFE
O Consello da Xunta declara que a situación de emerxencia sanitaria en Galicia é "compatible" con que haxa comicios autonómicos

O presidente galego, Alberto Núñez Feijóo, ratificou que "nuns días" anunciará a súa decisión sobre a data electoral das eleccións galegas, aínda que xa non oculta a súa preferencia por xullo --o primeiro domingo para o que podería chamar ás urnas é o 12-- e defendeu que, baixo o seu punto de vista, a campaña electoral non só debería ser "distinta" senón "moito máis curta". 

Feijóo tivo a oportunidade de falar cos seus conselleiros na reunión semanal do seu Executivo, un día despois de escoitar ao resto de partidos, como o obrigaba o decreto que deu pé a suspender a cita coas urnas convocada para o pasado 5 de abril, por mor da crise sanitaria do coronavirus. Un encontro no que se deu un paso máis para preparar o terreo para a convocatoria electoral

Así, o Consello da Xunta "modulou" o estado de emerxencia sanitaria para "adaptalo" ao último decreto de prórroga do estado de alarma estatal, que, segundo subliñou Feijóo, autoriza de forma "explícita" a cita coas urnas. "Queda subsumido no mesmo", remarcou o presidente. 

En concreto, o Goberno autonómico acordou a adopción das medidas necesarias para "garantir a saúde" cando se celebren eleccións. Desta forma, en canto se active o proceso, as administracións implicadas terían que adoptar as medidas necesarias con este fin. 

O Consello abordou a compatibilidade do marco xurídico en Galicia sobre a actual situación de crise sanitaria ocasionada polo Covid-19 e o desenvolvemento dun proceso de eleccións ao Parlamento e, após concluír que l último estado de alarma "non supón obstáculo algún" para que haxa comicios, declarou "que a situación de emerxencia sanitaria en Galicia é compatible" con que haxa comicios.

PSdeG, Galicia en Común e BNG piden unha "rectificación" da convoctoria
Os principais partidos da oposición en Galicia manteñen a súa cruzada contra as eleccións en xullo. O secretario xeral do PSdeG, Gonzalo Caballero, convidou a Feijóo a "rectificar" porque, ao seu xuízo, "non hai ningún informe científico nin médico que poida dicir que non mes de xullo haxa mellores garantías para votar que na primeira quincena de setembro", argumentou. 

O socialista criticou a Feijóo por "pecharse en si mesmo" e "illarse en San Caetano", alleo ás "preocupacións dos galegos". Caballero lamenta ademais que o líder do PPdeG rompese os compromisos asinados con outras forzas. "Rectifique para servir a Galicia en lugar de servir a axenda do seu partido ou a súa".

O portavoz de Galicia en Común- Anova Mareas, Antón Gómez Reino, advertiu pola súa banda de que Feijóo "desatenderá os problemas dos galegos" para centrarse na campaña electoral en plena pandemia. "É unha auténtica irresponsabilidade", insistiu.

O político coruñés, líder de Podemos Galicia, censurou ademais que a reunión do xoves con Feijóo foi "un teatro" no que durante dúas horas e media "Feijóo non recolleu ningunha das achegas da oposición". 

No Bloque, Ana Pontón convidou a Feijóo a "pensar no ben dos galegos" antes de convocar eleccións "sen garantías sanitarias nin democráticas", dixo. Ao seu xuízo, a data elixida será o 12 de xullo, polo que a convocatoria é "inminente", algo "irresponsable e non moi prudente nunha fase tan delicada como a desescalada", lamentou. "Este país necesita centrarse en loitar para facer fronte á pandemia: hai un país atravesando unha grave crise e precisamos a unidade de todos para levantalo".

 

"NUNS DÍAS". Preguntado expresamente sobre a data electoral, o presidente galego asegurou que aínda non ten "unha resposta cun día exacto", aínda que si se reafirmou en todos os argumentos que utilizou nos últimos días -sobre todo nos informes sanitarios solicitados pola Xunta- para evidenciar que se inclina por que sexan "canto antes". 

"Debemos valorar o escenario para poder celebrar eleccións no momento máis próximo posible, considerando que non estamos autorizados a convocalas 15 días antes, senón 54 días antes", alegou, antes de engadir que a súa intención é tomar unha decisión e anuncialo "nuns días". "Darémolo a coñecer nos prazos máis breves posibles", esgrimiu. 

Tras lembrar a cita que tivo co resto de partidos na pasada xornada, sinalou que "hai tres a favor de seguir os criterios dos expertos sanitarios" -convocar canto antes-, PP, Cs e En Marea; aínda que a formación laranxa defendeu posteriormente que prefería setembro. Os tres que rexeitan o horizonte de xullo son os rivais máis significativos dos populares: PSdeG, Galicia en Común-Anova Mareas e BNG. 

Pero en todo caso, Feijóo fixo outro cálculo: de acordo coa actual distribución da Cámara ve a "46 deputados" a favor de convocar e 29 que non o están.

A OPOSICIÓN, "CONTRA OS SEUS PROPIOS ACTOS". Feijóo declarouse "sorprendido" por "algunhas cousas", para advertir, a continuación, que se dixese que non convoca eleccións ata o fin da lexislatura sería "acusado" de "aferrarse ao poder". 

"Se situase as eleccións en setembro desatendendo aos expertos, diríaseme que actúo de maneira frívola e irresponsable... E se os expertos din que mellor canto antes, onte dixéronme o que opinan. O que non me dixeron é a súa alternativa", censurou. 

"Non me sorprende que estean en contra de calquera convocatoria electoral. Levo catro convocatorias e este tres partidos sempre estiveron en contra. Pero chámame a atención que este tres partidos vaian contra os seus propios actos", engadiu, antes de aludir que PSOE e Podemos votaron "a favor" do decreto para prorrogar o estado de alarma que autoriza "explicitamente" as eleccións, e o BNG abstívose. Así, interpretou que "van contra a normativa que eles mesmos aproban". 

Con estas claves, ratificou que espera anunciar a súa decisión após analizar e reflexionar "nos próximos días" sobre cal é a data na que os galegos corren "menos risco" para ir ás urnas. 

"Imos ter que votar coa pandemia. Haberá virus en xullo, en agosto, en setembro, en outubro, en decembro e o próximo ano. Pretendo que o presidente sexa lexítimo, e as urnas deben lexitimar a aquel ou aquela que os galegos queren que sexa presidente", reivindicou.

UNHA CAMPAÑA "MOITO MÁIS CURTA". Acerca de se comparte co PNV a necesidade de acurtar a campaña electoral (a súa duración habitual é de 15 días), Feijóo manifestou a súa convicción de que esta será "distinta". "A campaña electoral clásica non poderá facerse porque os tempos desas campañas pasaron, polo menos durante os dous próximos anos", prognosticou. 

"Temos que facer unha campaña distinta. Na nosa opinión moito máis curta? Sen dúbida. Preocuparnos prioritariamente da saúde da xente? Sen dúbida. Que non vai haber actos masivos? Por suposto", reflexionou, antes remarcar a súa coincidencia co PNV.

"SE NON CONVOCASE ESTARÍA PREVARICANDO". O presidente tamén vería "prudente" que o decreto de convocatoria electoral incluíse mecanismos para poder acometer unha nova suspensión se o esixise a situación. Pero engadiu que iso non significa que se teñan que acudir aos mesmos, igual que interpretou que se agora non convocase eleccións "estaría prevaricando". 

"Agora teño a obrigación legal de convocar as eleccións. Non teño ningún interese en participar nunhas nesta situación pero non podo elixir, se excedo o mandato estaría nun escenario de ilegalidade e de ilexitimidade. Os presidentes autonómicos, con parlamento disolto, non pode alargar o seu mandato sine die. Estaría nunha situación alegal", esgrimiu. 

Sobre a posible coincidencia cos vascos, Feijóo, quen nesta semana xa afirmou que sería "bo", defendeu que escoita "os mesmos criterios de prudencia e seguridade sanitaria que en Galicia no lehendakari (Iñigo Urkullu) e outros partidos vascos". 

"Espero que os socialistas vascos non escoiten ao secretario xeral dos socialistas galegos e se tomen de broma as súas manifestacións. Na mesma situación que se atopa o lehendakari atópome eu, na procura do momento con menor incerteza para ensaiar unha convocatoria electoral", esgrimiu. Se finalmente Galicia e Euskadi volven ir da man ás urnas, será a cuarta vez desde 2009. 

Feijóo non aclarou se comparecerá na Cámara a semana que vén, como lle tocaría segundo o acordo asinado coa oposición, pero xa esta semana o portavoz parlamentario do PPdeG, Pedro Puy, avanzara que, se hai unha convocatoria electoral --que podería materializarse o luns ou o martes como moi tarde se a data elixida é o 12 de xullo--, o acordo da Deputación Permanente que, entre outras cuestións incluía comparecencias quincenais do presidente, quedaría anulado.

"DISTANCIA FÍSICA" PARA VOTAR. Finalmente, Feijóo recalcou a situación excepcional que hai sobre a mesa e, tras apelar a non confiarse, insistiu en que é preciso estar "preparados para un rebrote". 

Tamén avanzou que haberá que articular novos mecanismos para a votación e preservar "a distancia física". "Pero igual que acudimos a terrazas, supermercados ou ao traballo, ir votar está dentro desa normalidade que adquirimos semana a semana. O que queira ir votar, buscaremos a fórmula para que vaia de forma segura", garantiu. 

Feijóo anunciará "nuns días" a data electoral e propón unha campaña...
Comentarios