sábado. 04.12.2021 |
El tiempo
sábado. 04.12.2021
El tiempo

Feijóo ve a Vox "un produto da esquerda" pero urxe a formar goberno en Andalucía

Alberto Núñez Feijóo.XOÁN REY (Efe)
Alberto Núñez Feijóo.XOÁN REY (Efe)

Silva pide pór límites "á ultradereita fascista" e En Marea avoga por unha "reflexión colectiva"

As eleccións andaluzas, co desastre do PSOE, a irrupción de Vox e un posible pacto de dereitas para gobernar axitaron a política española. Desde Galicia, os catro partidos con representación parlamentaria xa fixeron a súa análise.

Feijóo culpa a Sánchez da irrupción de Vox
O presidente da Xunta de Galicia, Alberto Núñez Feijóo, ve en Vox "un produto dese disparate" que foi a moción de censura pola que Pedro Sánchez é presidente do Goberno co apoio do independentismo catalán, Bildu e Podemos, e pediu negociación en Andalucía para que se forme un executivo encabezado polo PP. 

En declaracións á chegada ao Comité Executivo Nacional deste partido en Madrid, e preguntado se lle asusta un pacto con Vox, respondeu que o que lle dá medo é que Andalucía quede sen goberno, dada a "inestabilidade" do Executivo de Sánchez e a inexistencia, dixo, de goberno tamén en Cataluña. De non ser así, crecería a desconfianza na democracia "e xa os españois poden votar calquera cousa", advertiu. 

 

O BNG pregúntalle por un goberno "coa extrema dereita da man"
Precisamente, a viceportavoz do BNG, Olalla Rodil, analizou o "cataclismo" electoral de Andalucía e dirixiu unha pregunta ao presidente da Xunta, ante o resultado dos comicios, que arroxa unha maioría absoluta coa suma de PP, Cidadáns e Vox: "Que lle parece gobernar coa extrema dereita collida pola man?". 

En rolda de prensa, interpelou ao presidente popular sobre a súa opinión sobre gobernar cunha formación "homófoba, racista, machista, que se quere cargar o movemento feminista dunha plumada". "Quere ir da man da extrema dereita, que nega os dereitos dos galegos?", continuou Rodil. 

O BNG advertiu de que o PP e Cidadáns "teñen un novo aliado resultado da involución democrática" e mostrouse "preocupado" por saber "que pensa o señor Feijóo" sobre a posibilidade de que os populares gobernen con esta formación política. 

 

Silva pide pór límites "á ultradereita fascista"
A presidenta da Deputación de Pontevedra, a socialista Carmela Silva, realizou este luns un chamamento "aos demócratas" para "pór límites xa á ultradereita fascista" que ten como obxectivos "a ruptura dos dereitos e das liberdades". 

Así, a mandataria socialista ha mostrado a súa "enorme preocupación" pola irrupción de VOX no Parlamento andaluz e advertiu de que "o discurso da confrontación, do medo ao outro e da linguaxe bélica, leva aos extremismos". 

Nesta liña, Silva sinalou que o fascismo "xa chegou, está aquí". "Temos que facer unha profunda reflexión os partidos situados na esquerda", asegurou, para analizar cales son as demandas reais da cidadanía e "responder con proxectos" que lles devolvan a confianza dos votantes. 

 

En Marea pide unha "reflexión colectiva" ante o auxe da extrema dereita
En Marea mostrou a súa "preocupación" polo auxe da "extrema dereita" despois de que a formación Vox se fixese con 12 escanos nas eleccións autonómicas de Andalucía e invitou a unha "reflexión colectiva" para ofrecer unha alternativa política fincada en valores republicanos, democráticos e sociais. 

Nun comunicado, o portavoz de En Marea, Luís Villares, asegurou que o "enfraquecemento do bipartidismo pola fartura ocasionada pola corrupción encamíñase cara a opcións políticas de extrema dereita" e "non cara a alternativas como Adiante Andalucía, que se presentaba coa bandeira da rexeneración e os dereitos sociais". 

Ante iso, propuxo "reflexionar" sobre aspectos como "a incapacidade" da formulación actual da esquerda rupturista de aglutinar unha "alternativa de rexeneración política e ilusión social" e a capacidade "de sedución crecente na poboación da extrema dereita", na liña das "tendencias neofascistas en auxe no resto de Europa". 

Feijóo ve a Vox "un produto da esquerda" pero urxe a formar goberno...
Comentarios