Gómez-Reino chama a apartar da Xunta aos que "podreceron" os sillóns

Gómez-Reino, en un acto este martes. EFE
photo_camera Gómez-Reino, nun acto este martes. EFE

O candidato á presidencia da Xunta por Galicia en Común-Anova Mareas, Antón Gómez-Reino, pediu este martes o voto para a súa formación co obxectivo de apartar do Goberno galego os membros dun PP "que podreceron os sillóns" de San Caetano.

"Podreceron os sillóns e xa non distinguen o seu partido corrupto dunha institución que é a nosa, de todos os galegos e por iso o 12 de xullo recuperaremos a Xunta para Galicia", proclamou no acto de peche de xornada na pista polideportiva do paseo marítimo do Graxal en Cambre.

O aspirante á presidencia da Xunta animou a participar nuns comicios nos que ve "a cita máis fundamental da historia da democracia en Galicia", para deixar atrás "este decenio negro acabado e caduco" que representa a etapa de Alberto Núñez Feijóo.

O portavoz da coalición tamén se referiu á situación do sector pesqueiro, que asegurou que se verá "mellorada" despois de que o Consello de Ministros aprobase un real decreto con melloras laborais para este colectivo. Puxo en valor que entre as medidas ás que deu luz verde o Ministerio de Traballo, dirixido por Yolanda Díaz, destacan a obriga de formalizar o contrato por escrito e o dereito do traballador á atención médica.

Fronte a esa actuación, asegurou que "o que sabe Feijóo das rías galegas e do mar é o que viu desde o barco do seu amigo Marcial Dorado, do que xa non se acorda", dixo.

Comentarios