Incautados máis de 2.500 quilos de sardiña sen documentar en Porto do Son

As capturas, que non foran pesadas nin declaradas, foron transportadas nunha embarcación que non tiña autorizado atracar no porto
Sardiña requisada en Porto do Son. GARDACOSTAS
photo_camera Sardiña requisada en Porto do Son. GARDACOSTAS

Axentes de Gardacostas de Galicia e do Servizo Marítimo da Garda Civil incautaron durante a madrugada deste martes máis de 2.500 quilos de sardiña en Porto do Son. 

A mercancía requisada carecía da documentación necesaria para garantir a súa trazabilidade, segundo indica a Xunta de Galicia nun comunicado de prensa. 

As capturas, que non foran pesadas nin declaradas, foron transportadas nunha embarcación que non tiña autorizado atracar no porto de Porto do Son. O buque foi devolto ao mar inmediatamente logo da operación policial. 

Unha vez incautado, os axentes de Gardacostas e da Garda Civil procederon a pesar o peixe na lonxa de Portosín para despois comprobar que se trataba de 2.559,5 quilos de sardiña. 

A Xunta indicou, na mesma nota de prensa, que a mercancía requisada será entregada ao Banco de Alimentos de Santiago de Compostela. 

Comentarios