A Policía Nacional investiga un suposto delito contra a liberdade sexual no festival O Son do Camiño de Santiago, que se celebrou entre o xoves e o sábado da semana pasada no Monte do Gozo.
A investigación abriuse logo da denuncia interposta por unha das asistentes á cita, segundo informaron fontes policiais consultadas por Europa Press. Ao parecer e dado que a vítima non recorda nada, estúdase a posibilidade de que sexa obxecto dunha submisión química.
En concreto, os feitos que se investigan producíronse, supostamente, nunha zona de acampada nas proximidades do lugar no que tiveron lugar os concertos, que congregaron a varias decenas de miles de persoas durante os tres días que durou o festival.
