O investigado pola desaparición da pontevedresa Sonia Iglesias, Julio Araújo, continúa este xoves hospitalizado pendente de ser sometido a unha intervención cirúrxica.
Segundo comentaron a Europa Press fontes próximas a Julio Araújo, está pendente de ser operado, posiblemente este xoves, en relación á afección pulmonar que sofre, neumotórax, despois de que a intervención fora aprazada.
As mesmas fontes explicaron que Araújo permanece en estado "grave, pero non crítico" e prevén que sexa sometido este xoves a unha intervención cirúrxica no complexo hospitalario compostelán.
Araújo fora trasladado o sábado desde un hospital de Pontevedra ata o Complexo Hospitalario Universitario de Santiago (CHUS), tras ingresar o pasado xoves día 22 cando acudiu a urxencias afectado dun proceso respiratorio severo.
O traslado produciuse posteriormente ao necesitar o paciente ser atendido por un servizo que se atopa no complexo hospitalario compostelán.
INVESTIGACIÓN. Araújo, investigado por homicidio no caso pola desaparición de Sonia Iglesias, sofre unha patoloxía grave e o xoves día 22 ingresou nun hospital de Pontevedra, un día despois do interrogatorio ao que foi sometido na Comisaría da Policía Nacional na cidade do Lérez.
A causa foi reaberta oito anos despois da desaparición de Sonia Iglesias en agosto de 2010, e a Policía Nacional manteno a el e ao seu irmán David Araújo como investigados.
A semana pasada os axentes realizaron rexistros nunha casa da familia do investigado situada na rúa Camposanto, na que a muller desaparecida viviu con Juliuo Araújo ata pouco despois de que nacese o fillo que ambos teñen en común.
