Luz verde da USC ao primeiro grao aberto, impulsado desde o Campus de Lugo
A Escola Politécnica Superior de Enxeñaría e a Facultade de Ciencias do Campus de Lugo impulsan o primeiro grao aberto da Universidade de Santiago de Compostela. O Consello de Goberno aprobou este venres a proposta, que busca avanzar no obxectivo de lograr unha maior eficiencia no uso de recursos e, ao mesmo tempo, ampliar as posibilidades de elección do alumnado.
Deste xeito, a institución compostelá dá os primeiros pasos para contar o próximo curso académico con esta nova modalidade, unha experiencia piloto que permitirá aos alumnos escoller entre materias de varias carreiras antes de decidirse por unha vía definitiva. Galicia sería o terceiro territorio do Estado en contar cunha proposta deste tipo.
O obxectivo destes graos abertos, anunciados pola Xunta durante a inauguración do curso académico, é paliar as cifras de abandono de estudos universitarios, que alcanza ao 20 por cento no caso dos estudantes de primeiro ano e os 1.200 que cambian de carreira durante os dous primeiros cursos do seu grao.
A proposta da USC combina materias de ata cinco graos, nos que o estudiantado poderá cursar 90 créditos cun recoñecemento mínimo de 60 créditos cursados no grao finalmente elixido. Así mesmo, na fase de implantación, o número de prazas ofertadas para cada programa será de dez e permitiría a constitución dun grupo propio de docencia interactiva.
A oferta deste grao na rama de 'Enxeñaría e Arquitectura' permitirá presentar un sistema máis amplo e competitivo
Así o informa a institución compostelá nun comunicado, no que destaca que a oferta deste grao na rama de 'Enxeñaría e Arquitectura' permitirá presentar un sistema máis amplo e competitivo para favorecer a atracción de estudantes doutras comunidades e mellorar o intercambio.
MENCIÓN DE EXCELENCIA. Doutra banda, a USC concorrerá á convocatoria da Xunta para a concesión de mención de excelencia a titulacións de mestrado con Enxeñaría ambiental, Enxeñaría química e de bioprocesos; o interuniversitario en Investigación química e química industrial; Matemática Industrial e Psicoloxía Xeral Sanitaria.
Ademais, deuse o visto e prace á proposta para concorrer ás axudas Beatriz Galindo convocadas pola Secretaría de Estado de Universidades, Investigación, Desenvolvemento e Innovación e destinadas á atracción do talento investigador.
Tamén aprobou o plan económico-financeiro do período 2019-2020 e acordouse iniciar os trámites para a cesión da Casa de Jimena e Elisa Fernández de la Vega, entre outras cuestións.
