Os servizos de emerxencia continúan este luns a procura dun posible cadáver nas inmediacións da praia de Canelas, en Sanxenxo, despois de que uns surfeiros avistasen flotando o domingo o que, na súa opinión, podería tratarse dun corpo.

Os surfeiros avisaron ao 112 Galicia ao fío das 19.30 horas deste domingo e indicaron que viran o cadáver dun home flotando e que o mar o estaba arrastrando cara á costa.

Os mozos deron aviso a Emerxencias, aínda que matizaron que estaban demasiado lonxe como para asegurar que o obxecto que viron ondulando fose un cadáver.

No entanto, Salvamento Marítimo, a Garda Civil e Emerxencias de Sanxenxo inspeccionaron a zona sen chegar a atopar nada.

O centro de atención ás emerxencias de Galicia mobilizou a Salvamento Marítimo e ao servizo de Gardacostas de Galicia, así como a Garda Civil, Policía Local e ao GES de Sanxenxo. O dispositivo por mar e terra despregouse na zona de rocas, preto do illote Papa Timóns.