Cinco persoas resultan feridas nunha saída de vía en Tui
En Moaña produciuse unha colisión múltiple ►En Ponte Caldelas unha menor tivo que ser asistida
Dez persoas resultaron feridas esta tarde en distintos accidentes de tráfico que ocorreron nos termos municipais de Tui, As Neves, Moaña e Ponte Caldelas.
En Tui, cinco persoas precisaron asistencia médica, tres delas menores, despois dunha saída de vía que tivo lugar á altura do número 4 da rúa da Guarda.
Ata o lugar achegáronse os servizos sanitarios e os axentes da Policía Local. Ademais, o persoal do Centro Integrado de Atención ás Emerxencias informou do ocorrido aos Bombeiros do Baixo Miño e á Agrupación de Voluntarios de Protección Civil de Tui.
O 112 Galicia tivo constancia do accidente ás 17:15 horas.
CHOQUE MÚLTIPLE. Ademais, unha colisión ocorrida en Moaña entre dous coches e un camión saldouse cunha persoa ferida, que tivo que ser evacuada ao Hospital Povisa. Ocorreu na PO-551, concretamente no punto quilométrico 31, ao redor das 12:15 horas.
Desde o CIAE 112 Galicia solicitouse a intervención, tras recibir a alerta a través dunha persoa particular, do 061-Urxencias Sanitarias, dos Bombeiros do Morrazo, da Policía Local, da Garda Civil de Tráfico e da Agrupación de Voluntarios de Protección Civil de Moaña. Ademais, os xestores do 112 Galicia puxeron a situación en coñecemento dos Bombeiros de Vigo e do servizo de mantemento da estrada.
ACCIDENTE ENTRE DOUS COCHES. Unha menor tivo que ser atendida polos servizos sanitarios despois de producirse unha colisión entre dous turismos en Ponte Caldelas.
O sinistro tivo lugar no punto quilométrico 10,800 da PO-532, uns minutos antes das 17:00 horas.
Unha persoa particular contactou co 112 Galicia para alertar do sucedido e, decontado, desde o CIAE 112 Galicia pasouse o aviso ao 061-Urxencias Sanitarias, á Garda Civil de Tráfico, aos Bombeiros do Morrazo e ao servizo de mantemento da vía.
COLISIÓN ENTRE FURGONETA E COCHE. Por outra banda, nas Neves, tres persoas resultaron feridas nunha colisión na que se viron implicados un coche e unha furgoneta. Segundo se lle indicou ao 112 Galicia, dúas das vítimas viaxaban no turismo accidentado e a outra na furgoneta.
Cómpre destacar que, para atención das persoas feridas, descartouse empregar o material de excarceración ao atoparse accesibles despois do accidente.
O sinistro tivo lugar na estrada que une Ponteareas e As Neves, ao fío das 16:00 horas.
Foi unha persoa particular quen alertou do accidente ao 112 Galicia e, nada máis ter constancia, desde o CIAE 112 Galicia requiriuse a intervención do 061-Urxencias Sanitarias, dos GES e Bombeiros de Ponteareas e do Servizo de Prevención, Extinción de Incendios e Salvamento do Baixo Miño.
