A Fiscalía solicita dous anos de prisión para un home acusado dun delito de agresión sexual no seu propio domicilio no ano 2016. O xuízo celebrarase o próximo 27 de xuño ás 10.00 horas na Audiencia Provincial.
Os feitos rexistráronse na mañá posterior á madrugada de Fin de Ano, na localidade de Burela. O acusado atopábase en compañía de M., á que momentos antes invitara a que o acompañase á súa casa. O home agarrouna fortemente polos brazos e tirouna sobre a cama, onde empezou a bicala na boca, a pesar da negativa de M. a manter relacións sexuais co acusado quen, para vencer a súa resistencia, comezou a separarlle as pernas.
A pesar diso, M. con decidida oposición, comezou a darlle patadas podendo finalmente liberarse do seu agresor e abandonar a vivenda.
O fiscal solicita dous anos de prisión e a prohibición de aproximarse a menos de 200 metros da prexudicada, o seu domicilio e lugares frecuentados por ela, ademais de evitar o contacto por calquera medio, ademais de pagarlle unha indemnización de 2.500 euros á muller.