O presidente do comité de empresa da planta de Alcoa na Coruña, Juan Carlos López Corbacho, espera que a convocatoria de eleccións xerais o 28 de abril anunciada este venres por Pedro Sánchez non afecte á elaboración do estatuto de consumidor electrointensivo, que "pode ser tramitado aínda que o Goberno estea en funcións". "O estatuto xa pasou no seu momento polo Congreso dos Deputados e, de estar o Goberno en funcións, só quedaría que o Consello de Ministros lle dera a súa aprobación, ten capacidade para sacalo adiante", asegurou en declaracións a Efe o presidente do comité de empresa.
A aprobación deste estatuto é fundamental para o futuro das plantas de Alcoa e Avilés, xa que, aínda que a ministra de Industria, Reyes Maroto, anunciou que había investidores dispostos a adquirir as fábricas, os traballadores están convencidos de que as mellores ofertas chegarán cando se estableza un marco regulatorio estable para as empresas de gran consumo. "O Ministerio comprometeuse a sacar adiante o estatuto en seis meses, pero esperamos que chegue moito antes e podamos ter pronto acceso ao borrador, para poder avaliar as propostas que vaian chegando e escoller a mellor", apuntou Corbacho, quen recordou que o período de exposición de devandito estatuto conclúe este venres.
Está previsto que a mesa organizada polo Ministerio de Industria xunto a traballadores e Gobernos autonómicos se celebre o próximo 12 de marzo; antes, a próxima semana, os traballadores da Coruña e Avilés reuniranse coas autoridades galegas e asturianas para establecer o proxecto industrial que buscan. "A semana que vén teremos esa reunión coa Xunta de Galicia para ir filtrando proxectos industriais e buscar o mellor escenario para vender as plantas para, despois, levar todo ese traballo ao Ministerio o próximo 12 de marzo", avanzou o representante dos traballadores.
A aposta do persoal segue sendo a posta en marcha integral da planta, coa fundición e as series de electrólise traballando a pleno rendemento, o que garantiría, á súa vez, a continuidade dos postos de traballo.
As dúas series de electrólise da planta da Coruña pararon esta semana por primeira vez en 61 anos, un proceso lento, xa que os traballadores tiveron que arrefriar paulatinamente "o corazón da fábrica", as cubas onde se produce o aluminio primario a temperaturas próximas ao 900 graos. "Estamos a pasar polos días máis tristes para os que traballamos por esta empresa; o acordo alcanzado con Alcoa implicaba parar a electrólise e fixémolo sen incidencias e do mellor xeito posible", asegurou Corbacho, quen espera, como todo o persoal, "que o momento de arrincar de novo chegue o máis pronto posible".
Como consecuencia desta parada, algúns traballadores "estarán uns días sen ocupación", aínda que o vindeiro martes presentarase un plan de formación e o persoal dedicarase tanto a temas de formación como ao mantemento das instalacións "para deixar a planta o mellor posible para cando chegue un novo produto".
