O consello cidadán autonómico de Podemos en Galicia aprobou por unanimidade abordar a situación de "anormalidade democrática" no seo da formación En Marea e definiu de "caza de bruxas" as pretensións de que dimita a deputada autonómica Paula Quinteiro.
Podemos, que integra unha coalición xunto a outros partidos no seo de En Marea, fixo así un chamamento "a reconstruír o espazo político de cambio" na comunidade.
Desta forma o órgano político de Podemos, a través dunha consulta telemática, acordou actuar sen "dilación nin ambigüidade" sobre a situación de En Marea na que a que, por parte da dirección orgánica, existe o intento "de impor sobre o grupo parlamentario" o seu criterio.
Segundo Podemos, a decisión da dirección de En Marea non representa a pluralidade e rexeita a proposta xurdida por mor dun incidente de Quinteiro con axentes de Policía, e a pretensión de consultar ás bases sobre a dimisión da parlamentaria autonómica por iso.
O "auténtico referente da pluralidade política e social do rupturismo democrático" é o grupo parlamentario, e que foi avalado polos votos de 10.000 persoas nas eleccións galegas de 2016, sinala Podemos.
Deste xeito, ese partido reafirma o seu respaldo a Quinteiro á que considera "vítima dunha caza de bruxas interesada e orquestrada polo PP" e reprocha a En Marea os intentos dalgúns sectores de pedir a súa dimisión.