Os policías detidos en Ourense presentan dúas vivendas como aval para pagar as fianzas

Os dous policías detidos por mor das investigacións polo roubo de seis armas da Comisaría de Ourense (entre 2014 e 2015), a publicación de anónimos que apuntaban a existencia dunha trama interna de corrupción e a morte doutro axente en dependencias policiais, presentaron este martes dúas vivendas como garantía para o pago da fianza de 60.000 euros que lle impuxo a cada un a titular do Xulgado de Instrución número tres. 

Tras pasar a disposición xudicial o pasado domingo, a xuíza Eva Armesto decretou que ambos os axentes, que son irmáns xemelgos, quedasen en liberdade baixo fianza e concedeulles un prazo de cinco días para facer entrega desta cantidade. 

Ademais, impúxolles a obriga de comparecer ante o xulgado de Instrución máis próximo ao seu domicilio todos os días, entregar os seus pasaportes e prohibiulles abandonar o territorio nacional. 

Os axentes tardaron pouco máis dun día para facer entrega da fianza. A primeira hora da mañá ambos se achegaron ata o Xulgado de Instrución número tres de Ourense, en compañía do seu letrado, para presentar dúas vivendas familiares como garantía.  No caso de que isto non sexa suficiente, mostraron a súa disposición para achegar a cantidade en metálico que sexa necesaria para cubrir completamente a fianza. 

Os axentes teñen senllos pisos en Ávila (onde un traballaba como monitor de tiro na Academia de Policía) e en Ribeira (A Coruña); ademais do domicilio familiar en Toén (Ourense) no que se atopan ambos tras ser postos en liberdade. 

Ademais, ao irmán que traballa na Academia de Ávila (o outro está xubilado por incapacidade permanente) requiríuselle a entrega das dúas pistolas que posúe como axente, porque por mor da detención privóuselle do dereito de tenencia e porte de armas. As dúas fóronlle requisadas despois de que explicase onde se atopaban.

REXISTROS. Ao longo da mañá realizouse un rexistro dos dous vehículos que están incautados na Comisaría de Policía e que quedaban por analizar en busca de probas. 

O pasado domingo procedeuse ao rexistro dun Volvo, no que se atoparon restos de sangue que uno dos irmáns explicou que procedían de transportar no seu interior os restos dun porco tras unha matanza familiar. 

Este martes a xuíza Eva Armesto, o fiscal e o avogado da defensa estiveron presentes durante o rexistro dos outros dous coches incautados, un Audi A5 e un Peugeot, sen que se atopase nada de relevancia.  Desde a defensa confirmouse a intención de solicitar que se devolvan ambos os vehículos "por non ser útiles para a causa".

DETENCIÓN. O pasado venres os dous irmáns xemelgos eran detidos por mor das investigacións da Policía Xudicial de Ourense como responsables dos delitos de roubo con forza, tenencia ilícita de armas, revelación de segredos, simulación de delito ante funcionario, denuncia falsa, inxurias e calumnias (entre os anos 2014 e 2015), pero tamén pola súa posible implicación na morte dun axente na Comisaría (en abril de 2016). 

Os feitos que investiga a titular do Xulgado de Instrución número tres de Ourense iniciáronse en agosto de 2014, coa desaparición de tres armas do búnker da Comisaría. En febreiro de 2015 volveron desaparecer outras tres armas. 

Na rede wifi do Sindicato Unificado de Policía (SUP) de Ourense apareceron varios anónimos que vincularon a desaparición das armas cunha rede interna de corrupción na que algúns axentes tamén farían a vista gorda a actividades de traficantes para obter información. 

Unha investigación de Asuntos Internos non logrou dar co paradoiro das armas, pero rematou coa coñecida como operación Zamburiña (cuxa causa segue instruíndo o Xulgado número uno de Ourense) que supuxo o desmantelamento da unidade antidrogas e a suspensión de seis dos seus integrantes. 

En abril de 2016 producíase o último suceso vinculado a este caso, a aparición do corpo do que fora responsable de Comunicación da Policía de Ourense (e compañeiro de traballo dun dos dous detidos) cunha nota na que se confesaba autor dos roubos e dos anónimos.