Pontón: "A Feijóo dálle vergoña acompañar a Casado de turismo electoral a Alcoa"

A portavoz nacional do BNG, Ana Pontón, afirmou, durante a presentación da candidatura nacionalista pola provincia de Lugo para o 5-A, que Alberto Núñez Feijóo é "tan consciente" da "responsabilidade" do PP na crise das empresas electrointensivas que "lle dá vergoña" acompañar a Pablo Casado na súa visita á planta de Alcoa en San Cibrao, que cualificou como "turismo electoral".

A candidata nacionalista á presidencia de na Xunta responsabilizou ao PP de deseñar "o marco eléctrico" que propiciou a subida do prezo da luz.

Responsabilidade que, ao seu xuízo, comparte o PSOE porque "non foi capaz de modificar" ese marco e porque presentou un estatuto para as empresas electrointensivas que considera "insuficiente".

Ana Pontón cargou as tintas contra Núñez Feijóo porque "vetou" a proposta do BNG de que Galicia dispuxese dunha tarifa eléctrica propia, seguindo o exemplo do País Vasco, onde, segundo asegurou, a portavoz nacionalista, as empresas afórranse 60 millóns de euros anuais.

A candidatura do BNG pola provincia de Lugo volve estar encabezada por Olalla Rodil, que asegurou que esta fronte nacionalista "sae a por todas" para que o próximo 5 de abril se produza "un cambio real no noso país".