A concelleira de goberno de Democracia Ourensana, Ana Isabel Rebanales Rodríguez, presentou a súa renuncia á acta de concelleira e ao seu cargo no concello de Ourense, debido "a discrepancias internas de organización", "estritamente de estratexia profesional concernente á concellaría que dirixe".
Así o informou a través dunha comunicado Democracia Ourensana, a formación do alcalde Gonzalo Pérez Jácome –que goberna con 7 concelleiros–. O partido explica na súa información que Ana Isabel Rebanales é "un dos valores máis importantes en DO e sempre contará con ela para o futuro do partido pola súa alta capacidade e competencia, tanto política como profesional".
Neste sentido, "incluso" expón que DO estaría aberto a contar con Rebanales como "posible persoal de confianza en calquera momento ou lugar". "De feito, DO sempre confiou en Ana Isabel", recolle o comunicado, no que o partido de Jácome recorda que Rebanales fora candidata ao Parlamento de Galicia en 2016 por DO.
Con todo, atribúe a súa marcha ás "diverxencias e puntos distintos de vista sobre como encarar este mandato ao mando da Concellaría de comercio e seguridade cidadá", como "factores decisivos para que Ana Isabel decidise non continuar á fronte do equipo".
Democracia Ourensana conclúe eloxiando a Ana Isabel Rebanales Rodríguez "polo seu enorme valía" e lamentando "profundamente" a súa decisión de abandonar a corporación.
A renuncia comunicada este domingo é a segunda que rexistra Democracia Ourensá tras as eleccións municipais, logo da dimisión en xuño de Ana Isabel Bertólez por motivos "persoais".