Máis de dous meses despois do inicio da primeira folga indefinida da xustiza en Galicia, cando os xuízos e trámites xurídicos suspendidos se suman por miles, a nova reunión celebrada este mércores entre Xunta e sindicatos do sector xudicial non só non permitiu achar unha saída senón que recrudeceu o conflito.
Tanto é así que, ao termo do encontro, houbo cun cruzamento de acusacións entre un "perplexo" e "indignado" Alfonso Rueda e os representantes da Xustiza, que o acusan de "mentir".
O vicepresidente da Xunta, na súa comparecencia ante os medios, revelou que había un preacordo con catro do sete sindicatos -SPJ-USO, UXT, CSIF e CC.OO.- para que a folga acabase esta mesma xornada.
Dito acordo, entre outras cuestións, e segundo a versión de Rueda, volvía elevar a subida salarial para os funcionarios de Xustiza e incorporaba un plan de recuperación de traballo de arredor "do 80 por cento". Pero o comité de folga, no que ademais deste catro sindicatos, están STAJ, CIG e Alternativas na Xustiza-CUT, volveu a dicir "non".
A oferta da Xunta era de 135 euros para xestores, 127 para tramitadores e 122 para corpos de auxilio, cunha suba dun 50% este ano, un 30% por cento o próximo en 2020.
A anterior proposta era de 133,42 euros para os primeiros, 108,42 para os segundos e 105 para os terceiros, cun 35% o primeiro ano, outro 35% o segundo e o 30 % restante en 2020.
Nesta conxuntura, Rueda subliñou que comparecía persoalmente, xunto ao resto de negociadores da Xunta, para constatar que esta oferta "xa perdeu a súa validez" unha vez que o acordo non se pechou, e avanzou "que non vai haber ningunha subida máis". "Isto non é ningunha poxa, nin un xogo de nenos", sentenciou.
Manuel González Carvajal (UXT) declarou que "unha vez máis a prepotencia da Xunta fai que os cidadáns teñan que seguir sufrindo a mala xestión, a mala política do señor Rueda". Recoñeceu que os sindicatos aceptaron flexibilizar o período de aplicación do acordo, ao chegar ao tres anos, pero Rueda decidiu "deixar a todos os galegos cun conflito por 12 euros".
Consultado pola acusación do vicepresidente sobre a existencia dun preacordo cos sindicatos SPJ USO, FeSP UXT, CSIF e CCOO, González Carvajal acusouno de mentir e retouno a facer público o documento asinado. "O compromiso non é certo, ninguén se comprometeu a levalo á asemblea. Se ten o acordo, que o traia e que o ensine", engadiu.
"Rueda mente, mente á hora de facer as ofertas, condena aos galegos e as galegas porque non quere solucionalo por doce euros", abundou. Agora os sindicatos sopesan "recrudecer as mobilizacións" e piden "novamente a dimisión de Rueda", ao que avisan de que a súa baixada ata os 140 euros ao mes tamén queda retirada ao ser rexeitada.
