O total de hospitalizados con covid-19 en Galicia descendeu en 24 pacientes, pero aumentaron os ingresados con coronavirus en Uci en 11 até situarse nos 253. Con respecto á xornada pasada aumentaron lixeiramente os contaxios, cun milleiro máis.
Así se reflicte nos datos publicados na mañá deste martes pola Consellería de Sanidade con rexistros até as 18,00 horas deste luns, nos que se indica que os hospitalizados en Uci sitúanse en 253 -once máis- mentres que os que permanecen en planta descenden en 24 até os 1.186, o que sitúa o cómputo total de ingresados con covid en 1.439 -un total de 13 menos que a xornada anterior-.
Este descenso de hospitalizados débese principalmente á redución de pacientes ingresados na área da Coruña e Cee, onde aínda que soben en sete os hospitalizados con covid en Uci até os 93, descenden en 18 os que se atopan noutras unidades (323); e na de Santiago e Barbanza, onde aumentan en tres os que se achan en UCI (47), pero caen en 15 até os 141 os doutras unidades.
Tamén descenden os ingresados na área de Pontevedra e O Salnés, cun menos en Uci (30) e un menos noutras unidades de hospitalización (130). Mentres, na de Ourense mantéñense sen cambios en 13 os que están en Uci e descenden nun até os 184 os que permanecen noutras unidades.
Pola súa banda, no distrito sanitario de Ferrol baixan nun os pacientes con covid en Uci (23) e soben en dúas os que están noutras unidades (166); mentres que no de Vigo aumentan nun até os 25 e en seis até os 172, respectivamente. Tamén hai un lixeiro incremento na área de Lugo, con dous pacientes máis en Uci (22) e tres máis noutras unidades (70).
CASOS E CONTAXIOS
Este martes subiron os casos activos de coronavirus en Galicia até os 22.522, o que supón 102 máis que a xornada anterior, após o descenso da xornada anterior. En concreto, baixan en dúas áreas sanitarias: Ourense (2.874) e na da Coruña e Cee (5.883), mentres que soben nas de Vigo (3.861), Santiago e Barbanza (3.442), Pontevedra e O Salnés (2.503), Ferrol (1.824) e Lugo (2.135, o que supón cinco máis).
En canto aos contaxios diarios detectados por diferentes tipos de probas, aumentaron en 1.001, após situarse na xornada pasado por baixo do milleiro por primeira vez en varias semanas. Con todo, descenderon os positivos confirmados por PCR nas últimas 24 horas até os 791, fronte aos 880 da xornada anterior. Até o momento en Galicia realizáronse 1.434.487 PCR, 11.080 máis con respecto a este luns.
Deste xeito, as persoas contaxiadas en Galicia sitúanse en 99.076, o que supón 1.001 máis que a xornada anterior, delas 22.751 corresponden á área da Coruña; 18.920 á de Vigo; 16.192 á de Santiago e Barbanza; 13.420 á de Ourense; 10.566 á de Pontevedra e O Salnés; 10.415 á de Lugo; e 6.812 á de Ferrol.
Pola súa banda, a taxa de positividade -porcentaxe de infeccións por PCR realizadas- ascende lixeiramente a un 7 por cento, após caer a un 6,7% na xornada anterior, aínda por encima do 5% que marca a OMS para dar por controlada a pandemia e do que Galicia non baixa desde o 24 de decembro.
FALECIDOS E CURADOS
Os falecidos con covid-19 en Galicia durante a pandemia aumentaron a 1.815, despois de informar nas últimas horas Sanidade de 40 falecementos -correspondentes a varios días-, o que representa a maior cifra comunicada na pandemia nunha xornada.
Esta cifra de 40 falecidos supera os 36 mortos notificados o 1 de abril, na primeira onda, a que até agora supuña o peor dato comunicado na crise sanitaria -tamén correspondente a varios días-.
Até a data curáronse de covid-19 en Galicia un total de 74.752 persoas, o que supón 859 máis que as 73.893 rexistradas até este luns.
