Solicitan que impidan a entrada nos supermercados a clientes sen máscaras
A CIG-Servizos denuncia "a total irresponsabilidade" das principais cadeas de comercio de alimentación que operan en Galicia con respecto ao material protector que empregan os clientes, polo que demandan a estas empresas que fagan un control estrito" e que impidan a entrada nos supermercados a persoas que non leven máscara.
A través dun comunicado, o sindicato denuncia que esta situación "é xeneralizada" e que a "falta de control" xera "gran malestar" entre os consumidores que si a empregan, seguindo a instrución marcada polo Goberno desde o pasado xoves que establece que a máscara é obrigatoria en espazos nos que non é posible manter a distancia de seguridade de dous metros.
Neste sentido, a CIG matiza que non pide ás cadeas que fagan funcións de policía", senón que "exerzan a súa responsabilidade" e establezan "unhas normas de acceso claras e sinalizadas" do mesmo xeito que se obriga á clientela a empregar luvas e desinfectante na entrada.
Por isto mesmo, a central nacionalista considera que incluso se debe "facilitar máscaras" a aquelas persoas que non a teñan. "E se alguén non quere utilizala, que se lle impida o acceso ao supermercado, xa que o resto da clientela e as traballadoras e traballadores teñen dereito a comprar e traballar coa máxima seguridade e protección posible", engade.
Ademais, reclama ás empresas que "sinalicen debidamente" a obrigatoriedade das máscaras, posto que nalgúns establecementos "nin sequera hai información" neste sentido, "só cartelería coa recomendación"; mentres que os que indican que si é obrigatorio "tampouco impiden a entrada" aos que non a levan.
Xunto a todo iso, a CIG advirte que "en moitas tendas non se están respectando os límites de aforamento máximo permitido, razón pola que -asegura- día si día tamén as delegadas e delegados diríxense ás direccións para que se tomen medidas".
