A Garda Civil interceptou un condutor temerario tras saltarse o confinamento e causar un accidente de tráfico en Lalín. O home perdera a vixencia do permiso de condución por infraccións previas e o coche carecía de seguro obrigatorio e non pasara a inspección técnica.
Atendendo á información do instituto armado, o corpo recibiu á última hora da tarde deste mércores varias chamadas telefónicas para alertar da presenza dun turismo Renault Megane que facía trompos e circulaba "a unha velocidade extremadamente inadecuada, con perigo para as persoas", no centro urbano de Vila de Cruces.
Varias patrullas do Destacamento de Tráfico de Lalín iniciaron un operativo coa finalidade de interceptar o vehículo e identificar o seu condutor. Sobre as 21.00 horas, os axentes tiveron coñecemento da saída de vía dun turismo nunha estrada local que une O Corpiño e A Goleta, no termo municipal de Lalín.
O mozo resultou ileso na saída de vía
Unha vez no lugar, comprobaron que o condutor do turismo, un veciño de Silleda de 23 anos --que estaba ileso--, conducía un coche de idénticas características ao que buscaban, "sendo compatible a utilización destas pistas cunha intención de evadir os controis policiais que se estableceron na zona".
O investigado, que deu negativo nas probas de alcol e drogas, non puido xustificar o motivo do desprazamento que realizaba, polo que incumpría o confinamento establecido tras a entrada en vigor do estado de alarma pola crise sanitaria.
DOUS DELITOS. Así as cousas, o equipo de atestados instrúe dilixencias por dous delitos contra a seguridade viaria, un como resultado dunha condución "manifestamente temeraria", subliña a Benemérita, e outro con motivo da condución tras a perda de vixencia do permiso. Remítense ao xulgado de instrución de garda de Lalín.
Ademais, tramitáronse denuncias por carecer de seguro obrigatorio, por non pasar a ITV e por saltarse as normas de confinamento no estado de alarma.
