Os traballadores de Alcoa levan a súa loita ao Parlamento galego

Os traballadores de Alcoa da planta de San Cibrao, en Cervo, concentráronse este venres ante o Parlamento de Galicia, con motivo da sesión constitutiva da Cámara, para recordar aos deputados “que o primeiro que teñen que facer aquí dentro é arranxar o problema da Mariña, como se comprometeron a facer todos en campaña”.

“Non se pode tirar a Mariña simplemente porque a unha multinacional non lle dea a gana de sentar; só lle faltaría que este país permitise a unha multinacional americana pisar a todo o Goberno central”, apuntou o presidente do comité de empresa, José Antonio Zan, en declaracións aos xornalistas.

O representante dos traballadores puxo en dúbida a vontade negociadora de Alcoa, tendo en conta que “un non se pode sentar a negociar counha pistola encima da mesa” nin pode “exporlle á empresa interesada, Liberty House, que ten que pagar unha sanción tan gorda como que paren as cubas cando insiste en que non as quere paradas”.

“A Xunta debe esixir á empresa que sente a negociar sen condicións. O que non se pode permitir é que se paren as cubas, o corazón da fábrica, é algo que nunca imos asinar”, proseguiu.

“É unha auténtica vergoña e unha falta de respecto que a empresa non sente nin coa ministra de Industria, Reyes Maroto, nin co conselleiro de Economía, Francisco Conde”

Zan tamén cargou contra a negativa de Alcoa a sentar a negociar este xoves alegando que os traballadores lle lanzaron ovos aos representantes da compañía. “Están a falar de botar a 1.000 persoas á rúa e devolver a unha comarca enteira aos anos 70 e por un ovo din que se van”, aseverou.

“É unha auténtica vergoña e unha falta de respecto que a empresa non sente nin coa ministra de Industria, Reyes Maroto, nin co conselleiro de Economía, Francisco Conde”, engadiu.

Así mesmo, o presidente do comité de empresa recordou que a fábrica “xa era do Estado antes de que chegasen eles”, cando a Sociedade Española de Participacións Industriais (SEPI) dixo que era “un negocio ruinoso”.

“Se ten que volver á Sepi que volva, aínda que sexa por só un minuto para venderlla a outro”, expuxo o líder sindical.