O departamento de Xustiza da Xunta anunciou a convocatoria dunha reunión da mesa sectorial este martes para concluír o conflito que mantén aos funcionarios en folga indefinida desde o 7 de febreiro.
Durante a xornada na que o paro indefinido cumprirá 98 días naturais consecutivos, o Goberno galego citou aos representantes sindicais no edificio administrativo da Xunta ás 13:00 horas.
A Xunta convocou a dous representantes dos sindicatos SPJ-USO, AXG-CUT, FeSP UXT e CSIF, ademais dun único representante de STAJ, CIG e CC OO.
O vicepresidente da Xunta, Alfonso Rueda, explicou que espera que a reunión permita "pechar o conflito definitivamente" e considera que o comité de folga está extinto.
Os sindicatos, con todo, defenden que o comité de folga, que abandonaron representantes de CC OO e a cuxas reunións non acoden os de FeSP UXT nin de CSIF, está á espera de desculpas públicas,e é o único órgano interlocutor válido, por lei, para abordar as reivindicacións.
A mesa sectorial de Xustiza é un organismo paritario entre os sindicatos e a Xunta presidido polo director xeral de Xustiza do Goberno autonómico, Juan José Martín.
O presidente dese órgano ten voto de calidade, polo que pode sacar adiante calquera proposta súa en solitario ou co respaldo dun único sindicato.
A Xunta prevé propor a mesma oferta que presentou e que os funcionarios rexeitaron o 27 de abril en votacións, e Rueda xustifica que a súa proposta foi "negociada" en reunións nas que participou persoalmente con representantes de SPJ USO, FeSP UXT, CSIF e CC OO.