A Xunta informou este xoves de que ofrece ampliar o permiso de maternidade e paternidade aos funcionarios da Administración de Xustiza, que pasarían de 16 a 20 semanas, e de 29 días a 5 semanas, respectivamente.
Na reunión co comité de folga do persoal de Xustiza, "a Xunta mostrou de novo a súa vontade negociadora e ofreceu unha nova mellora: a ampliación tanto do permiso de maternidade como do de paternidade, sendo trasladada esta mellora no documento entregado onte ás organizacións sindicais", informa nun comunicado.
O permiso de maternidade establecido na normativa básica do emprego público do Estado é de 16 semanas, e a partir de agora terán 20 semanas máis 2 de preparto. Desta ampliación do permiso de maternidade poderá beneficiarse tanto o pai como a nai que sexan empregados públicos.
En canto ao permiso de paternidade, actualmente é de 29 días segundo a lexislación básica do Estado, sendo ampliado este permiso ata as 5 semanas, como recolle a Lei de Emprego Público de Galicia.
O Goberno galego indica que a medida que agora se adopta por parte da Xunta situaría aos funcionarios xudiciais "á cabeza de todas as comunidades autónomas en conciliación por maternidade e paternidade na Administración de Xustiza, xa que o período de conciliación familiar retribuída do persoal da Administración deXustiza galega situarase na media dos 5 meses".
Ademais, engádese no comunicado, a Xunta recolle no mesmo documento o ofrecemento para incrementar a contía do complemento autonómico transitorio por encima da media do resto de comunidades autónomas, o que se traduce nunha subida global de entre 660 e 900 euros ao ano, en función do corpo.
POSTOS FIXOS. A Administración autonómica tamén trasladou o seu compromiso de converter en fixos os postos que levan máis de tres anos con contratos temporais.
Adicionalmente a Xunta ofreceu melloras en materia de violencia de xénero, que pasan pola creación de 7 prazas de psicólogo para os servizos de atención ás vítimas existentes nas sete cidades galegas, o reforzo de persoal nos xulgados de violencia sobre a muller naqueles casos nos que sexa necesario pola súa carga de traballo, e o establecemento dun complemento lineal por obxectivos ligados ao traballo en violencia de xénero, que se traducirá no pago dunha cantidade aos funcionarios dos xulgados de violencia de entre 50 e 100 euros ao mes, en función do tipo de xulgado.
Os representantes dos sindicatos deron por rotas as negociacións este mércores e tras un peche de varias horas en dependencias da administración autonómica, de onde foron desaloxados, anunciaron que a convocatoria de folga indefinida a partir do próximo mércores 7 de febreiro.
