Michelle Obama desbanca a Hillary Clinton como muller máis admirada nos EUA
Hillary Clinton sitúase agora terceira, por detrás da presentadora Oprah Winfrey
Michelle Obama desbancou como muller máis admirada en Estados Unidos a Hillary Clinton, que levaba 17 anos ocupando esa privilexiada posición, segundo unha enquisa publicada hoxe pola firma Gallup.
A esposa do ex-presidente Barack Obama (2009-2017), que terminara en segunda posición desta lista anual en tres ocasións, foi elixida polos estadounidenses como a muller máis apreciada do país en 2018.
Hillary Clinton, que foi a candidata demócrata ás eleccións presidenciais de 2016, caeu ata o terceiro lugar da listaxe tras ser superada tamén pola popular presentadora de televisión Oprah Winfrey.
Pola súa banda, a actual primeira dama, Melania Trump, ocupou a cuarta praza da clasificación de Gallup.
Entre as dez primeiras clasificadas tamén se atopan mulleres como a raíña Isabel II do Reino Unido; a chanceler alemá, Angela Merkel; e a ex-embaixadora dos EUA ante as Nacións Unidas Nikki Haley.
Doutra banda, Obama foi considerado o home máis admirado de Estados Unidos por undécimo ano consecutivo, situándose por diante do actual mandatario, Donald Trump, que ocupa o segundo posto.
O papa Francisco, Bill Gates e Elon Musk, entre outros, completan a lista dos dez homes máis respectados do país norteamericano.
