A Academia das Ciencias e as Artes Cinematográficas de Hollywood anunciou este xoves nun comunicado que, tras unha votación, decidiu expulsar aos seus membros Bill Cosby e Roman Polanski por non cumprir as normas de conduta da organización. A decisión, tomada polos membros da Xunta de Gobernadores da entidade, chega poucos días despois de que o cómico estadounidense fora declarado culpable de tres delitos de agresión sexual.
Cosby, icona da cultura popular de EE.UU., foi declarado o pasado 26 de abril culpable de tres delitos de agresión sexual, nun xuízo cargado de simbolismo, o primeiro para un personaxe famoso desde a eclosión do movemento Me too (Eu tamén). Os delitos polos que foi declarado culpable o actor son penetración sen consentimento, penetración mentres se está inconsciente e penetración tras a subministración dun estupefaciente.
Máis de 60 mulleres acusaron a Bill Cosby de abusar sexualmente delas entre os anos 1960 e 2000, aínda que eses casos non prosperaron por prescribir e só se levou a xuízo o fallado este xoves, polas acusacións da canadense Andrea Costand.
Polanski, pola súa banda, está acusado en Estados Unidos de violar en 1977 a Samantha Geimer, que tiña 13 anos no momento dos feitos, aínda que a muller desde hai anos asegura que perdoou ao director e quere pechar o caso. Posteriormente, apareceron outras acusacións de mulleres contra o cineasta, como a de Marianne Barnard, quen asegurou que foi acosada sexualmente polo realizador durante unha sesión fotográfica na que o cineasta a retratou espida.
O pasado agosto, outra muller, identificada como Robin M., denunciou publicamente en Los Ángeles que Polanski abusou dela en 1973 cando era unha adolescente de 16 anos. En 2010, foi Charlotte Lewis quen cargou contra o realizador por abusos.
O director declarouse culpable no caso de Geimer, pero fuxiu a Europa antes de recibir a súa condena. Polanski, de 84 anos, presentou o ano pasado unha serie de documentos para regresar a Estados Unidos e pechar o caso sen ter que pasar por prisión, pero un xuíz de Los Ángeles rexeitou a súa proposta.
