A policía británica achou este mércores os cadáveres de 39 persoas que se atopaban no colector dun camión nunha zona industrial do condado inglés de Essex –preto de Londres– e detivo ao condutor do vehículo como sospeitoso de asasinato.
Os axentes confirmaron que atoparon de madrugada os corpos sen vida de 38 adultos e un adolescente en Waterglade Industrial Park, na localidade de Grays, do citado condado.
O corpo policial de Essex detivo ao condutor do camión, un home de 25 anos, procedente de Irlanda do Norte, como sospeitoso de asasinato e estao interrogando.
A policía recibiu unha chamada do servizo de ambulancias pouco antes das 12.40 GMT para notificarlles o achado dos cadáveres.
"Trátase dun incidente tráxico no que un gran número de persoas perdeu a vida", afirmou este mércores o xefe da policía Andrew Mariner, que agregou que as investigacións a fin de establecer o ocorrido continúan.
Mariner adiantou que os axentes tratan agora de identificar ás vítimas aínda que alertou de que ese proceso "podería ser longo".
"Cremos que o camión é de Bulgaria e entrou no país en (o porto de) Holyhead (ao norte de Gales) o sábado, 19 de outubro", sinalou.
O xefe policial indicou que o home detido é o condutor do vehículo.
