A multinacional estadounidense Apple presentou este mércores os seus novos modelos de teléfono intelixente, os iPhone XS e XS Max, cunha pantalla cuberta por un novo tipo de cristal, protección especial ante líquidos, e dispoñibles en dourado, prateado e gris.
"Hoxe levamos o iPhone X ao seguinte nivel. Preséntovos o que é, de lonxe, o iPhone máis avanzado que xamais creamos", indicou durante a presentación o conselleiro delegado de Apple, Tim Cook.
O iPhone XS ten unha pantalla de 5,8 polgadas (14,7 centímetros) con tecnoloxía OLED, introducida nos modelos do ano pasado e que incrementa o contraste e o brillo con respecto ás pantallas tradicionais LCD.
Como vén sendo habitual nos últimos lanzamentos de iPhone, Apple tamén presentou unha versión máis grande deste mesmo teléfono, bautizado iPhone XS Max, que ten unha pantalla de 6,5 polgadas (16,5 centímetros), a máis grande da compañía ata a data.
Apple incrementou o tamaño das pantallas sen practicamente aumentar as dimensións dos teléfonos con respecto aos seus predecesores, de maneira que, por exemplo, o iPhone XS, que ten unha pantalla igual de grande que o X, é no seu conxunto un dispositivo máis pequeno.
Entre as novidades do novo teléfono tamén se atopan melloras na reprodución de imaxes mediante as tecnoloxías Dolby Vision e HDR10, altofalantes con maior amplitude de son estéreo e un incremento da velocidade do sistema de recoñecemento facial introducido o ano pasado.
A protección ante a auga mellorouse de maneira que os teléfonos non se estraguen incluso "se caen á piscina" e fixéronse probas con todo tipo de líquidos, "incluso cervexa", apuntou o vicepresidente de Mercadotecnia da compañía, Philip Schiller.
