O barco da ONG alemá Lifeline, cuns 230 inmigrantes a bordo, chegou este mércores ao porto maltés da Valeta, logo de permanecer seis días no Mediterráneo central á espera de que algún país lle permitise desembarcar aos rescatados.
A embarcación arribou lentamente ao porto da capital de Malta e os inmigrantes, segundo mostraban os medios locais, apiñábanse na súa cuberta, logo de pasar seis días no mar tras o seu rescate pola negativa inicial de Italia e Malta de acollelos.
Finalmente atracou ás 19.38 locais (17.38 GMT) e no porto esperaban equipos de protección civil e outras autoridades.
O primeiro ministro de Malta, Joseph Muscat, anunciou este mércores que permitiría ao barco da ONG acceder aos seus portos logo de alcanzar un acordo para repartir aos refuxiados en oito países da Unión Europea (UE). Trátase de Malta, Irlanda, Italia, Luxemburgo, Portugal, Francia, Bélxica e Holanda, dixo Muscat en rolda de prensa.
O barco será inmobilizado e darase inicio a unha investigación para comprobar se cometeu irregularidades
O pacto contempla que estes Estados membros da UE repartiranse os refuxiados que haxa a bordo, mentres que "non serán acollidos aqueles que non cumpran os requisitos para a solicitude de asilo".
Muscat indicou ademais que a nave será inmobilizada e darase inicio a unha investigación para comprobar se cometeu irregularidades, primeiro en relación á bandeira holandesa que leva e que segundo o Goberno holandés non ten permiso para portar. En segundo lugar esclarecerase se o capitán do barco actuou correctamente ao dar a orde de salvar a estas persoas no mar, a pesar de que a Garda Costeira italiana pediulles que non interviñesen porque se ían a encargar os gardacostas libios.
O rescate produciuse o pasado 21 de xuño e a embarcación permaneceu á espera en alta mar, ás veces con duras condicións meteorolóxicas, pois Malta e Italia negábanse a facerse cargo da situación.
O novo Goberno italiano, do Movemento Cinco Estrelas e a ultradereitista Liga, rexeita acoller aos inmigrantes que sexan salvados polas naves da ONG, ás que acusa de fomentar a inmigración irregular coa súa presenza en augas internacionais fronte a Libia.
Italia si que permitiu na noite do pasado luns o desembarco no porto siciliano de Pozzallo (sur) dos 113 inmigrantes que se atopaban a bordo do mercante danés Alexander Maersk logo de ser salvados polo Lifeline.
