O presidente do PP, Pablo Casado, reclamou este domingo en Vitoria que o Goberno "extreme as precaucións" para evitar homenaxes ao exdirixente de Eta Santiago Arrospide, Santi Potros, que foi excarcerado tras pasar 31 anos na carcel por preto de 40 asasinatos.
Casado lanzou esta mensaxe nun acto celebrado en Vitoria, no que varias decenas de persoas o apuparon, chamáronlle "terrorista" e lanzáronlle reproches alusivos ás presuntas irregularidades no seu máster de Dereito Autonómico.
Ante esta protesta contra a súa persoa e contra o Partido Popular, o líder do PP asegurou que é necesario "recuperar a convivencia e a concordia", fronte a aqueles que representan unha "minoría radical" e "queren que non podamos falar no País Vasco do que lles interesa aos españois".
Casado, que estivo acompañado polo presidente do PP, Alfonso Alonso, e outros dirixentes populares, defendeu a necesidade de construír "unha sociedade en liberdade, con seguridade e sen ningún tipo de presións ou insultos".
Na súa intervención ante os medios de comunicación, Casado recordou á nena Silvia Martínez, asasinada por Eta nun atentado cometido en 2001 en Santa Pola (Alacante), e que este domingo cumpriría 18 anos.
O presidente do PP anunciou que o seu partido acudirá o xoves á localidade alacantina con motivo do aniversario do atentado. Casado afirmou que o desaparecido Eta "non pode obter rédito algún agora que deixou de matar, igual que non o tivo cando mataba".
Tamén se referiu á saída de prisión do exdirixente de Eta Santi Potros, que permaneceu 31 anos no cárcere polos preto de 40 asasinatos nos que participou. Casado reclamou ao Goberno central que "extreme as precaucións" para evitar se que celebren "actos de enaltecemento ou homenaxes" a este "sanguinario terrorista".
O dirixente do PP considera que é necesario contar cunha nova Lei de Memoria, Dignidade e Xustiza "para homenaxear ás vítimas e para que non se toleren as homenaxes a terroristas".
ACHEGAMENTO DE PRESOS. Por outra banda, Casado respondeu á reclamación dalgunhas vítimas do terrorismo que pediron ao PP que non "fale no seu nome" e que se mostraron partidarias de que os reclusos de Eta cumpran condena en prisións próximas aos seus lugares de orixe, tal e como ocorre co resto dos presos.
O presidente do Partido Popular asegurou que o seu partido "non fala en nome das vítimas do terrorismo", ás que expresou o seu "máximo respecto". O líder do PP recordou que unha trintena de membros deste partido foron asasinados por Eta, e que "miles" deles "foron extorsionados, tiveron que ir escoltados ou tiveron que emigrar" pola ameaza terrorista.
