A Garda Civil comisou un león africano disecado que unha muller vendía por 5.995 euros a través dun portal de compravenda de segunda man en internet.
Os axentes deron co animal a finais do pasado mes de xullo, cando rastrexaban un portal de internet dedicado á compravenda de obxectos de segunda man, e días despois, o 3 de agosto, citáronse coa propietaria do animal na súa casa de Castelldefels (Barcelona).
Trátase dun exemplar de león africano macho, adulto e en perfecto estado, naturalizado por taxidermia e colocado sobre unha base de cartón pedra que, ao parecer, o sogro da súa actual propietaria, xa falecido, cazara en Namibia nos anos 90 e gardado posteriormente nun trasteiro.
A especie está catalogada con alto grao de protección na Convención sobre o Comercio Internacional de Especies Ameazadas de Fauna e Flora Silvestres (CITES).
Tras o seu comiso, o león foi trasladado ao Servizo Oficial de Inspección, Vixilancia e Regulación de Exportacións (SOIVRE) para a súa análise e verificación, e posteriormente ao Castell dels Tres Dragons, sede do Museo de Ciencias Naturais de Barcelona, onde quedou exhibido para que poida ser visitado polos cidadáns.
A propietaria do animal está a ser investigada pola Garda Civil como presunta autora dun delito contra a fauna e comercio de especies ameazadas, e as dilixencias do caso foron remitidas á Fiscalía de Urbanismo e Medio Ambiente de Barcelona.
Comisan un león africano disecado que se vendía por 6.000 euros por internet
O sogro da súa actual propietaria, xa falecido, cazárao en Namibia nos anos 90
